Պետական եկամուտների կոմիտեի նախագահ Դավիթ Անանյանի գլխավորած պատվիրակությունը հուլիսի 2-4-ը Բրյուսելում մասնակցել է Հարկային մարմինների ներեվրոպական կազմակերպության (IOTA) 23-րդ ընդհանուր ժողովին: Այս մասին NEWS.am-ին հայտնում են ՀՀ ՊԵԿ տեղեկատվության եւ հասարակայնության հետ կապերի բաժնից։
Միջոցառմանը մասնակցել են կառույցին անդամակցող 44 երկրների հարկային մարմինների ղեկավարներ եւ բարձրաստիճան այլ պաշտոնատար անձինք:
IOTA-ի ամենամյա ընդհանուր ժողովը կազմակերպության գլխավոր միջոցառումն է, որի վարչական նստաշրջանի ընթացքում ընդունվում են կազմակերպության կարեւոր որոշումները: Այս տարվա ժողովն ընտրել է IOTA-ի նոր Գործադիր քարտուղարին, Գործադիր խորհրդի նոր անդամներին, նախագահին եւ ներքին աուդիտորներին: Հաստատվել են կազմակերպության ֆինանսական եւ աուդիտորական հաշվետվությունները, 2020 թվականի աշխատանքների ծրագիրը: Քննարկվել են կազմակերպության կանոնադրական փաստաթղթերում փոփոխությունների կատարման վերաբերյալ հարցեր:
Ընդհանուր ժողովի տեխնիկական նստաշրջանն անցել է «Արդյո՞ք հարկային մարմինները պատրաստ են վաղվա հարկային ծառայողին» կարգախոսի ներքո: Նիստին քննարկվել են հարկային մարմինների կադրերի կառավարման ոլորտում միջազգային միտումները, հարկային ծառայողների գործունեության գնահատման համար կիրառվող արդիական մոտեցումները, պատրաստվածության եւ առաջնորդության խթանման խնդիրները, հարկային ծառայության գրավչության բարձրացման ուղիները:
IOTA 23-րդ ընդհանուր ժողովի արդյունքներով ստորագրվել են ժողովի ընդհանուր որոշումը եւ կոմյունիկեն, ինչպես նաեւ IOTA-ի եւ ԵՄ իրավապահ մարմինների համագործակցության գործակալության (Europol) միջեւ մտադրությունների հուշագիրը:
