Հուլիսի 5-ին աշխատանքային այցով Արցախում գտնվող ՀՀ ԱԳ նախարար Զոհրաբ Մնացականյանը հանդիպեց Արցախի ԱԳ նախարար Մասիս Մայիլյանին:
ԱԳՆ-ից NEWS.am-ին հայտնում են, որ Հայաստանի ԱԳ նախարար Զոհրաբ Մնացականյանը կարեւորեց նման ձեւաչափով կանոնավոր հանդիպումների անցկացումը, ինչը լավ հնարավորություն է ընձեռում հանգամանալից անդրադառնալու, գնահատելու Լեռնային Ղարաբաղի խաղաղ գործընթացի ներկա փուլը եւ ուղենշելու հետագա քայլերը:
«Սա արտահայտում է մեր գերակա նպատակը. Լեռնային Ղարաբաղի ներգրավվածության ամրապնդումը, որի ապահովումն առաջին օրվանից եղել է մեր նպատակը։ Սա շատ պրակտիկ, պրագմատիկ նպատակ է, որովհետեւ եթե մենք իրապես ցանկանում ենք խաղաղ կարգավորման մեջ գործնական շարժում, այս հիմնախնդրի հիմնական սուբյեկտի ներգրավվածությունը մնում է կարեւոր»,- նշեց Հայաստանի ԱԳ նախարարը:
Հայաստանի եւ Արցախի արտաքին քաղաքական գերատեսչությունների ղեկավարներն անդրադարձան Լեռնային Ղարաբաղի հիմնախնդրի խաղաղ կարգավորման գործընթացին առնչվող մի շարք հարցերի։ Երկուստեք ընդգծվեց խաղաղ գործընթացի առաջմղման համար նպաստավոր մթնոլորտի ձեւավորման ուղղությամբ իրական քայլերի ձեռնարկումը։
Զոհրաբ Մնացականյանը եւ Մասիս Մայիլյանը անդրադարձ կատարեցին տարբեր ոլորտներում երկու երկրների արտաքին քաղաքական գերատեսչությունների միջեւ համագործակցությանը եւ միջազգային գործընթացներում Արցախի ներգրավվածության ընդլայնման ուղղությամբ երկուստեք քայլերի ձեռնարկմանը։
Հանդիպման ավարտին ԱԳ նախարարները ստորագրեցին Հայաստանի եւ Արցախի արտգործնախարարությունների միջեւ խորհրդակցությունների պլան, որը նախատեսում է 2019-2020 թթ. անցկացնել կանոնավոր խորհրդակցություններ արցախյան հիմնախնդրի եւ արտաքին քաղաքական հետաքրքրություն ներկայացնող հարցերի շուրջ:
Այնուհետեւ Հայաստանի արտաքին քաղաքական գերատեսչության ղեկավարը եւ Մասիս Մայիլյանը ճեպազրույց ունեցան լրատվամիջոցների ներկայացուցիչների հետ:
