Մարդու իրավունքների հարցերով ՄԱԿ-ի գերագույն հանձնակատար Միշել Բաչելեթը հայտարարել է, որ Վենեսուելայի դեմ տնտեսական պատժամիջոցները վատթարացնում են հումանիտար իրավիճակը երկրում, հաղորդում է ՌԻԱ Նովոստի-ն:
Վերջերս Բաչելեթն այցելել էր Վենեսուելա, որտեղ հանդիպել էր իշխանության եւ ընդդիմության ներկայացուցիչների հետ: Ուրբաթ գերագույն հանձնակատարը ներկայացրել է զեկույց Վենեսուելայում մարդու իրավունքների մասին ՄԱԿ-ի մարդու իրավունքների խորհրդի առջեւ:
«Վերջին տնտեսական պատժամիջոցները վատթարացնում են իրավիճակը երկրում՝ հաշվի առնելով, որ երկրի արժութային եկամուտների մեծ մասը գոյանում է նավթի արտահանումից, որը մեծապես կախված է ԱՄՆ-ի շուկայից»,-հայտարարել է Բաչելեթը: Նա նաեւ նշել է, որ պատժամիջոցները բացասաբար են ազդում բնակչության շրջանում առաջնային առողջապահական ծառայություններ տրամադրելու հնարավորությունների վրա:
Վենեսուելայի դեմ ԱՄՆ-ի պատժամիջոցները գործում են 2015 թվականի մարտից, երբ նախագահ Բարաք Օբաման սահմանել էր դրանք մի շարք վենեսուելական բարձրաստիճան պաշտոնյաների դեմ՝ ի պատասխան Վենեսուելայից ամերիկյան դիվանագետների վտարման որոշմանը: Այդ օրվանից պատժամիջոցները բազմիցս համալրվել են: Վերջին շրջանում ԱՄՆ-ը խստացրել եր մի շարք պատժամիջոցներ Վենեսուելայի դեմ, այդ թվում՝ պետական ընկերությունների նկատմամբ: Հունվարի 28-ին Վաշինգտոնը հայտարարել էր Վենեսուելայի ազգային PDVSA նավթագազային ընկերության դեմ պատժամիջոցներ գործադրելու մասին:
Հունվարի 21-ին Վենեսուելայում մեկնարկել էին զանգվածային բողոքի ցույցերը նախագահ Նիկոլաս Մադուրոյի դեմ նրա երդմնակալությունից կարճ ժամանակ անց: Ազգային ժողովի խոսնակ, ընդդիմության ղեկավար Խուան Գուայդոն անօրինաբար ինքնահռչակվել էր որպես երկրի ժամանակավոր նախագահ: ԱՄՆ-ի գլխավորությամբ մի շարք Արեւմտյան երկրներ ճանաչել էին Գուայդոյին՝ որպես երկրի ղեկավար: Մադուրոն անվանել էր Գուայդոյին ԱՄՆ-ի խամաճիկ: Ռուսաստանը, Չինաստանը, Թուրքիան եւ մի շարք այլ երկրների սատարել էին Մադուրոյին որպես օրինական նախագահի: Մոսկվայում անվանել էին Գուայդոյի նախագահական կարգավիճակն անիրական:
