Ուկրաինայի նախագահ Վլադիմիր Զելենսկին դիմել է ՌԴ նախագահ Վլադիմիր Պուտինին՝ ԱՄՆ-ի, Մեծ Բրիտանիայի, Գերմանիայի եւ Ֆրանսիայի միջնորդությամբ Մինսկում հանդիպելու առաջարկով:
«Ցանկանում եմ դիմել Ռուսաստանի Դաշնության նախագահ Վլադիմիր Պուտինին: Հարկավո՞ր է խոսել: Հարկավո՛ր է: Եկեք քննարկենք, թե ումն է Ղրիմը եւ ով չկա Դոնբասում,- ասել է Զելենսկին երկուշաբթի Facebook-յան տեսաուղերձում: - Զրույցի այսպիսի ընկերախումբ եմ առաջարկում՝ դուք, ես, ԱՄՆ նախագահ Դոնալդ Թրամփը, Մեծ Բրիտանիայի վարչապետ Թերեզա Մեյը, Գերմանիայի կանցլեր Անգելա Մերկելը, Ֆրանսիայի նախագահ Էմանուել Մակրոնը»:
Անդրադառնալով այդպիսի հանդիպման վայրին՝ Զելենսկին ասել է. «Կարծում եմ Ալեքսանդր Գրիգորեւիչ Լուկաշենկոն մեզ հաճույքով կընդունի Մինսկում»:
«Մենք չենք փոխում եւ չենք հրաժարվում դիվանագիտական ոչ մի ձեւաչափից: Մենք առաջարկում ենք խոսել»,- եզրափակել է Ուկրաինայի նախագահը:
Նրա ուղերձը հաջորդել է անցած գիշեր տարածած նախաձեռնության հայտարարությանը՝ հուլիսի 12-ին Ռուսաստան – Ուկրաինա «Պետք է խոսել» թեմայով տեսակամուրջ անցկացնելու մասին: Դրա կազմակերպիչներն են ռուսական «Ռոսիա-1» հեռուստաալիքը եւ ուկրաինական NewsOne-ը:
Այս նախաձեռնությունն Ուկրաինայում խիստ արձագանք է առաջացրել: Մեծ թվով պաշտոնատար անձինք եւ մի շարք քաղաքական կուսակցություններ հանդես են եկել տեսակամուրջն արգելելու պահանջով: