Արարատի մարզում Զոդի կամրջի վրա տեղի ունեցած ողբերգական ավտովթարի դեպքի առթիվ հարուցված քրեական գործով այսօր՝ հուլիսի 8-ին, ձերբակալվել է Toyota Hilux-ի վարորդ Սողոմոն Հակոբյանը։ Այս մասին NEWS.am-ին հայտնեց ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժնի պետ Նաիրա Հարությունյանը:
Սողոմոն Հակոբյանը կասկածվում է ՀՀ քրեական օրենսգրքի ՀՀ քրեական օրենսգրքի 242-րդ հոդվածի 3-րդ մասով (ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ):
Ավելի վաղ հայտնել էինք, որ հուլիսի 6-ին, ժամը 15:15-ին «911» ծառայությանը տեղեկություն է հաղորդվել, որ Արարատի մարզում` Զոդի կամրջի վրա, տեղի է ունեցել ՃՏՊ. բախվել է երեք ավտոմեքենա. անհրաժեշտ է փրկարարների օգնությունը:
Պարզվել է, որ Զոդի կամրջի վրա բախվել են «Toyota», «ՎԱԶ-2106» եւ «ԳԱԶել» մակնիշների ավտոմեքենաները: Ըստ նախնական վարկածի՝ «Տոյոտա»-ն դիմացից խփել է «Գազել»-ին, որից հետո հետեւից եկող «ՎԱԶ 2106»-ը նույնպես հարվածել է «Գազել»-ին. դրանից հետո գազի արտահոսք է եղել ու բռնկում է եղել:
Ըստ նախնական տվյալների՝ կա 13 տուժած: Պատահարի հետեւանքով մահացել է 6 քաղաքացի,ա յդ թվում «Գազելի» վարորդը: