Չգրանցված աշխատողներն ավելի շատ փոքր ու միջին ընկերություններում են. խոշորներում նման բան հազվադեպ է պատահում: Այս մասին, այսօր՝ հուլիսի 9-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը:
Նրա խոսքով, ավելի շատ ծառայությունների ոլորտում են պատահում այդպիսի դեպքեր, ինչը ոլորտների յուրահատկությամբ է պայմանավորված. «Օրինակ, հանրային սննդի ոլորտում ընդունված է, որ ասենք մատուցողներին որոշակի ժամաքանակով ընդունում են աշխատանքի, մինչեւ օրենքով սահմանված կարգով ձեւակերպելը փորձաշրջան են անցնում: Եղել է, որ մտել ենք այդ ընկերություն, տեսել ենք, որ կա 50 աշխատակից եւ իրենց հայտարարագրել են 50 աշխատակից, բայց աշխատող 10-15-ի անունները դրանց մեջ չեն: Այսինքն անընդհատ ռոտացիա է լինում: Մենք ստիպված արձանագրում ենք, որ կոնկրետ անձը ձեւակերպված չէ, բայց այդտեղ կա նաեւ իրավական խնդիր»,-ասաց ՊԵԿ նախագահը:
Նրա ընդգծեց, որ փոքր ու միջին ընկերություններն ունեն շահութաբերության ցածր մակարդակ, հետեւաբար նրանք փորձում են ինչ-որ զարտուղի ելքեր փնտրել հարկեր քիչ վճարելու համար:
Անդրադառնալով 50 հազար նոր աշխատատեղի վերաբերյալ հայտարարություններին, Դավիթ Անանյանն ասաց. «50 հազար նոր աշխատատեղերի գերակշիռ մասը եղել են ստվերից դուրս եկածները: Մենք ապագայում ստվերից դուրս բերման նույնպիսի ծավալներ չենք սպասում»:
