Ավտոմեքենաներ արտադրողներն ու դիլերները միայն թղթի վրա են բարելավում էկոլոգիական ցուցանիշները: Եվրոպական ավտոմեքենաներն իրականում 42%-ով ավելի շատ վառելիք են օգտագործում, իսկ վնասակար արտանետումների մակարդակը բարձր է 12%-ով, գրում է «Europulse»-ը:
Նման եզրակացության են եկել գերմանական Get Real նախագծի մասնագետները: Հետազոտողները համեմատել են արտադրողների հայտարարած ցուցանիշներն իրական արդյունքների հետ: Դրա համար նրանք օգտագործել են տրանսպորտի վնասակար արտանետումների պաշտոնական վիճակագրությունն ու վառելիքի ծախսը, ինչպես նաեւ հետեւել Գերմանիայից հազարավոր վարորդների:
Հետազոտողները կարծում են, որ ավտոարտադրողներն ադապտացնում են իրենց ավտոմեքենաներն այնպես, որ դրանք անհրաժեշտ արդյունքներով լաբորատոր թեստեր անցնեն:
Նախագծի ստեղծողները մտադիր են փոփոխություններ առաջարկել ավտոմեքենաների ստուգման ոլորտում ԵՄ օրենսդրությունում՝ իրական պայմաններում առավել զգալի փորձարկումների համար:
Բացի այդ, նրանք մտադիր են բջջային հավելված թողարկել, որը կարող է վարորդներին օգնել հաշվարկել տարբեր մակնիշների ավտոմեքենաների վառելիքի ծախսը:
