ԵԱՀԿ Խորհրդարանական վեհաժողովի քաղաքական հարցերի կոմիտեն ընդունել էր որոշում, որն առաջարկել էր ֆրանսիացի պատվիրակը, որում ասվում է, որ ղարաբաղյան հարցը պետք է լուծվի բացառապես ԵԱՀԿ Մինսկի խմբի համանախագահության ձեւաչափով, երեք հավասար սկզբունքների՝ ուժի կամ ուժ կիրառելու սպառնալիքի չկիրառման, տարածքային ամբողջականության եւ ազգերի ինքնորոշման իրավունքի հիման վրա։ Այս մասին Հայաստանի Ազգային ժողովում հուլիսի 10-ի մամուլի ասուլիսում ասաց ԵԱՀԿ Խորհրդարանական վեհաժողովում հայկական պատվիրակության ղեկավար, կառավարող «Իմ քայլը» կուսակցության պատգամավոր Հայկ Կոնջորյանը՝ ամփոփելով դրա աշխատանքի արդյունքները ԵԽԽՎ ամառային խորհրդաժողովում, որը տեղի ունեցավ Լյուքսեմբուրգում հուլիսի 4-8-ը։
Բացի այդ, նրա խոսքով՝՝ հայկական պատվիրակությունը կարողացավ կանխել հակահայկական ձեւակերպումների ներառումը բանաձեւերից մեկում։ «ԵԱՀԿ ԽՎ քաղաքական կոմիտեն քննարկում էր բանաձեւի նախագիծը, որն առաջարկել էր իռլանդացի պատգամավորը։ Դրանում տարբեր պատճառներով տեղ էին գտել որոշ հակահայկական դրույթներ։ Եվ այն պետք էր քննարկել հանձնաժողովում եւ քվեարկել։ Բնականաբար, մենք հասկանում ենք, որ այդ ամենը չէր կարող տեղի ունենալ առանց Ադրբեջանի ակտիվ միջամտության։ Այն պահից, երբ իմացանք, որ նման բանաձեւի նախագիծ գոյություն ունի, սկսեցինք աշխատել խորհրդարանական դիվանագիտության բոլոր խողովակներով, որպեսզի բացառենք բոլոր հակահայկական ձեւակերպումները։ Մասնավորապես, բանաձեւի նախագծում կային այսպես կոչված «Ադրբեջանի 7 շրջանները»։ Մեր պատվիրակությունն իր ակտիվ ջանքերով այնպես արեց, որպեսզի այդ ձեւակերպումը չարաբաստիկ 7 շրջանների մասին հանվի, եւ այն չլինի ԵԱՀԿ ԽՎ բանաձեւում»,- ասաց Կոնջորյանը։
Նա նշեց, որ Ադրբեջանը մշտապես փորձում է բանակցային գործընթացը դուրս բերել ԵԱՀԿ Մինսկի խմբի ձեւաչափից եւ ջանում է օգտագործել բոլոր պլատֆորմները, որոնք նրանց միակողմանի բառապաշարը դարձնում են քննարկման առարկա միջազգային հանրությունում։ Այս առնչությամբ Հայկ Կոնջորյանը բավական կարեւոր համարեց, որ իրենք կարողացել են հաստատել ԵԱՀԿ ԽՎ մակարդակով, որ միակ լեգիտիմ կառույցը, որը զբաղվում է ղարաբաղյան հարցով, ԵԱՀԿ Մինսկի խմբի համանախագահությունն է, եւ որ խնդիրը պետք է լուծվի Հելսինկյան եզրափակիչ ակտի սկզբունքների հավասար կիրառմամբ։