Հունիսի 1-ից Ատոմակայանը գտնվում է պլանային վերանորոգման մեջ, շահագործման ժամկետի երկարացման ծրագրով աշխատանքներ են տարվում: Այս մասին NEWS.am-ի հետ զրույցում նշեց Հայկական ատոմակայանի գլխավոր տնօրեն Մովսես Վարդանյանը՝ անդրադառնալով էներգոհամակարգում տեղի ունեցած խափանումներին:
«Մինչեւ սեպտեմբերի 10-ը ատոմակայանը պլանային վերբեռնավորման մեջ: Էներգոհամակարգում եղավ լարման տատանում, մեզ մոտ էլ զգացինք: Հենց առաջին տատանումներից հետո մենք անցանք մեր ներքին դիզելային կայաններից սնուցման: Այսինքն անջատվեցինք էներգոհամակարգից եւ սնուցումն ստանում էինք դիզելային գեներատորներից: Մոտ 1 ժամ 20 րոպե շարունակեցինք այդպես աշխատել, եւ երբ էներգոհամակարգում վիճակը վերջնականապես, նորից վերադարձանք էնեգոհամակարգի սնուցման:
Այդ ընթացքում Ատոմակայնը միշտ ունեցել է որակյալ լարում եւ Ատոմակայանը անվտանգության որեւէ խնդիր չի ունեցել հիմա էլ չունի»,-ընդգծեց տնօրենը:
Նա դժվարացավ ասել, թե ինչ է տեղի ունեցել մյուս կայաններում. «Կլինի հանձնաժողով, կուսումնասիրեն, կհասկանան, թե որ կայանում ինչ է պատահել: մեզ մոտ որեւէ խնդիր չի եղել ու չկա»:
Ավելի վաղ NEWS.am-ը հայտնել էր, որ այսօր ժամը 12.30-ից էլեկտրականության խափանումներ են հանրապետության տարածքում: Հոսանքազրկումների հետեւանքով Երեւանի փողոցներում խցանումներ են առաջացել: Խաչմերուկներում չեն գործում լուսացույցները, ինչի հետեւանքով անկառավարելի վիճակ է առաջացել փողոցներում:
Այս առնչությամբ փոխվարչապետ Տիգրան Ավինյանը հայտնել է. «Ունենք վթար էներգետիկ համակարգում։ Երեւանի ՋԷԿ-ը եւ Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչեւ երեկոյան ժամը 7-ը կարգավորվի»:
