Այս պահին էներգախնայողության անցնելու կարիք չկա, քանի որ այն շրջանները, որոնք հոսանք ունեն, դա նորմալ լարման ու հաճախականության էլեկտրականություն է, սակայն կան շրջաններ, որտեղ դեռ հոսանք չկա: Այս մասին, այսօր՝ հուլիսի 10-ին, լրագրողների հետ զրույցում նշեց Տարածքային կառավարման և ենթակառուցվածքների փոխնախարար Հակոբ Վարդանյանը՝ անդրադառնալով այսօր Հայաստանի էներգահամակարգում տեղի ունեցած խափանումներին:
Նա անդրադարձավ տեղի ունեցածի պատճառներին եւ վարկածներ նշեց. «Էներգոհամակարգում նման անջատումները կարող են տեղի ունենալ բազմաթի պատճառներով. օրինակ կարող է որեւէ խոշոր խնդիր առաջանալ որեւէ կայանում: Միգուցե տեխնոլոգիական խնդիրը առաջացել է Հրազդանի ՋԷԿ-ի 5-րդ բլոկում, հետո ցանցի միջոցով հաճախականության խախտումները տարածվել են մյուս կայաններում:
Վարկած երկուս, որ հաճախականության տատանումը եղել է իրանական կողմից: Մենք իրանական էներգահամակարգի հետ մեկ համակարգ ենք: Միգուցե էնտեղ է եղել մեզ համար խոշոր վթար, բայց իրենց համար միգուցե փոքր վթար: Այդտեղից մագնիսական ալիքով եկել հասել է Հայաստան, որովհետեւ այդ պահին գիծը 300 մգվտ հզորությամբ ծանմրաբեռնված է եղել, Հայաստանից արտահանում է տեղի ունեցել:
Վարկած երեք, հնարավոր է Երեւանի ՋԷԿ-ում է եղել տեխնոլոգիական խնդիր, թեեւ Երեւանի ՋԷԿ-ն արդեն հերքել է: Ուսումնասիրությունները ցույց կտան, թե որտեղ է եղել խնդիրը»,-ասաց փոխնախարարը՝ հավաստիացնելով, որ վթարը որեւէ կապ չունի ատոմակայանի հետ, քանի որ ատոմակայանը չի աշխատում, կանգնած է հունիսի 1-ից:
«Եթե պարզվի, որ մարդկային սուբյեկտիվ գործոնների պատճառով է եղել նման վթար, օրենքով սահմանված կարգով այդ մարդիկ կպատժվեն:
Մասնագետները կարողացել են արագ արձագանքել եւ չենք նստել զրոյի վրա, ինչպես դա եղավ մի քանի տարի առաջ մեր հարեւան պետությունում: Մեր հաշվարկներով ժամը 7-ին էներգամատակարարումը վերականգնված կլինի ամբողջությամբ»,-ասաց Վարդանյանը:
Ավելի վաղ NEWS.am-ը հայտնել էր, որ այսօր ժամը 12.30-ից էլեկտրականության խափանումներ են հանրապետության տարածքում: Հոսանքազրկումների հետեւանքով Երեւանի փողոցներում խցանումներ են առաջացել: Խաչմերուկներում չեն գործում լուսացույցները: Այս առնչությամբ փոխվարչապետ Տիգրան Ավինյանը հայտնել է. «Ունենք վթար էներգետիկ համակարգում։ Երեւանի ՋԷԿ-ը եւ Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչեւ երեկոյան ժամը 7-ը կարգավորվի»: