Կառավարությունն իր այսօրվա՝ հուլիսի 11-ի նիստում որոշում կայացրեց արտոնություն տալ «ԷՅ ԸՆԴ ԷՄ ՌԵՅՐ» ընկերությանը:
Մասնավորապես, կառավարությունը բավարարեց գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից օգտվելու այդ ընկերության հայտը:
Որոշման հիմնավորման մեջ նշվում է, որ նախագծի մշակումը պայմանավորված է «ԷՅ ԸՆԴ ԷՄ ՌԵՅՐ» ՍՊԸ-ի կողմից գերակա ոլորտում իրականացվող ներդրումային ծրագրի իրականացումն ապահովելու անհրաժեշտությամբ:
Ընկերությունը ներմուծել է սարքավորումներ քաղցրահամ և հանքային ջրերի շշալցման համար: Ներկայումս անհրաժեշտություն է առաջացել ներմուծել ապրանքների լրացուցիչ խմբաքանակ` առաջիկա արտադրական պրոցեսի բնականոն ընթացքը չխաթարելու համար: Համաձայն ընկերության կողմից տրամադրված տեղեկատվության` ներդրումային ծրագրի շրջանակում ընկերությունում ստեղծվել է 14 նոր աշխատատեղ և իրականացվել 1,12 մլրդ դրամի ներդրում:
Մեկ այլ որոշմամբ կառավարությունը երեք տարի ժամկետով հետաձգեց ներդրումային ծրագրի շրջանակներում «Մոեֆֆգրուպ» ՍՊԸ-ի կողմից ապրանքների ներմուծման դեպքում մաքսային և հարկային մարմինների կողմից հաշվարկված ավելացված արժեքի հարկի գումարների վճարման ժամկետը:
«Մոեֆֆգրուպ» ՍՊ ընկերությունը հիմնադրվել է 2016 թվականին։ Ներդրումային ծրագրի շրջանակներում Ընկերությունը նախատեսում է ՀՀ, Արմավիրի մարզում զբաղվել AISI 304 տեսակի չժանգոտվող մետաղից հակավանդալային ապրանքների արտադրությամբ։ Նշված ներդրումային ծրագրով նախատեսվում է արտադրության ընդլայնում։ Ներկայացված ներդրումային ծրագրի շրջանակներում ընկերությունը մտադիր է կատարել ընդհանուր շուրջ 14,7 մլրդ դրամի չափով ներդրում, որից ցանկով ներկրվող հումքի, նյութերի և ապրանքների համար նախատեսված գումարը կկազմի շուրջ 14,5 մլրդ դրամ:
Ներդրումային ծրագրի իրագործման արդյունքում ընկերությունում երեք տարվա ընթացքում կստեղծվի 100 նոր աշխատատեղ` 130 հազ․դրամ միջին աշխատավարձով:
