Հունաստանի հյուսիսում Խալկիդիկի թերակղզում արտակարգ դրություն է հայտարարվել եղանակային վատ պայմանների հետեւանքով առաջացած աղետալի ավերածությունների պատճառով, երկրի վարչապետ Կիրիակոս Միցոտակիսը ծրագիրը փոխել է, «Ռիա Նովոստի»-ի փոխանցմամբ՝ հայտնել է ERT հեռուստաալիքը:
Չորեքշաբթի երեկոյան սկսված փոթորկի ժամանակ զոհվել է 6 մարդ, այդ թվում՝ 2 ռուսաստանցի, անհայտ կորել է մի ձկնորս, մոտ 100 մարդ վնասվածքներ է ստացել:
Շրջանում վաղ առավոտյան հայտարարվել է արտակարգ դրություն, հայտնում է հեռուստաալիքը:
Երկրի վարչապետը մշտական կապի մեջ է պատասխանատու նախարարների հետ, որոնք նրան իրազեկում են իրավիճակի եւ փրկարարների աշխատանքի մասին: Միցոտակիսը կառավարության ներկայացուցիչներին հանձնարարել է շտապ շրջան մեկնել, հայտնում է ERT-ն:
Գիշերը Խալկիդիկի է եկել քաղաքացիների պաշտպանության նախարար Միխալիս Խրիսոխոիդիասը, որը վաղ առավոտյան մասնակցել է կառավարության արտահերթ նիստին իրավիճակի նախնական գնահատման համար: Նա ցավակցություն է հայտնել զոհվածների ընտանիքներին: