Ոստիկանությունն ազատ արձակեց քաղաքապետարանի մոտից բերման ենթարկած Սոնա Աղեկյանին եւ մյուս քաղաքացուն, որոնք աղբով լի տոպրակ էին բերել եւ ցանկանում էին դնել քաղաքապետարանի շենքի մոտ:
Ոստիկանության Կենտրոնականի բաժնի մոտ Սոնա Աղեկյանը հայտարարեց, որ իրենց բերման ենթարկելն անիմաստ էր եւ ոստիկանությունն ապօրինի գործողություններ էր կիրառում իրենց հանդեպ:
«Մենք որեւէ քայլ չենք արել, որի համար անհրաժեշտ էր բերման ենթարկել»,-ասաց Աղեկյանը:
Նա հիշեցրեց, որ 2017 թվականի փետրվարի 13-ին Երեւանի ավագանիում տեղի ունեցած դեպքը. «Երբ Սերժի բռնապետական համակարգի ժամանակ Երեւանի ավագանու նիստերի դահլիճում մենք Նուբարաշենի խճուղուց բերված կոյուղաջրերը տարանք եւ ցուցադրեցինք Երեւանի այն ժամանակվա ավագանու ՀՀԿ-ական ոհմակին: Այն ժամանակ անգամ ՀՀԿ-ական ոհմակը չմտածեց, որ կարելի է որեւէ մեկին բերման ենթարկել:
Ոստիկանության ապօրինի գործողությունները գալիս են հուշելու մեզ, որ մենք այժմ ունենք դիկտատորական ռեժիմ: Նիկոլ Փաշինյանը վախենալով ձեռքերը գցել է փրփուրներից եւ դիկտատորի պես ասում է՝ այստեղ իշխանությունը միահեծան է, ով կնկատի թերությունները եւ կփորձի բարձրձայնել, նրա դեմը կառնենք ապօրինի գործողություններով՝ օգտագործելով օսիպյանական ոստիկանական ջոկատները:
Չենք վախենում պարոն բռնապետ, մենք գալիս ենք պայքարելու մինչեւ վերջ: Մենք կստիպենք, որ քաղաքապետը կատարի իր պարտավորությունները»,-հայտարարեց Աղեկյանը՝ հավելելով, որ իրենց գործողություններում որեւէ բռնարարք չի եղել:
Ոստիկանները քաղաքապետարանի դիմացից բերման ենթարկեցին Սոնա Աղեկյանին եւ եւս մեկ քաղաքացու (վիդեո)
