Երեւան-Երասխ ճանապարհին հուլիսի 6-ին տեղի ունեցած ողբերգական վթարից տուժած Ռուզաննա Հակոբյանի եւ Գագիկ Ղուկասյանի վիճակը շարունակում է մնալ կայուն ծանր. նրանք գիտակից վիճակում են, առողջական վիճակում մի փոքր դրական դինամիկա է նկատվում: Այս մասին NEWS.am-ի հետ զրույցում ասաց Երեւանի Ճառագայթային բժշկության և այրվածքների հանրապետական գիտական կենտրոն ԲԿ բուժական գծով փոխտնօրեն Կարինե Բաբայանը:
Նա նշեց, որ հիվանդները այս պահին թունավորման փուլում են գտնվում, եւ 15-20 օրից նոր կարելի է ճգնաժամային փուլը հաղթահարված համարել. «Գագիկը հնարավոր է մինչեւ շաբաթվա վերջ տեղափոխվբի հիվանդասենյակ, Ռուզաննա մի փոքր ուշ կտեղափոխվի»:
Նշենք, որ 37-ամյա Ռուզաննա Հակոբյանը եւ 28-ամյա Գագիկ Ղուկասյանը Սուրենավան գյուղից են:
NEWS.am–ին հայտնեց «Էրեբունի» ԲԿ գործադիր տնօրեն Միքայել Մանուկյանն էլ հայտնեց, որ «Էրեբունի» ԲԿ տեղափոխված Վայք քաղաքի 46–ամյակնոջ վիճակը կայուն է, նա տեղափոխվել է հիվանդասենյակ։
Ավելի վաղ հայտնել էինք, որ հուլիսի 6-ին, ժամը 15:15-ին «911» ծառայությանը տեղեկություն է հաղորդվել, որ Արարատի մարզում` Զոդի կամրջի վրա, տեղի է ունեցել ՃՏՊ. բախվել է երեք ավտոմեքենա. անհրաժեշտ է փրկարարների օգնությունը:
Պարզվել է, որ Զոդի կամրջի վրա բախվել են «Toyota», «ՎԱԶ-2106» և «ԳԱԶել» մակնիշների ավտոմեքենաները:
Պատահարի հետևանքով մահացել է 6 հոգի, 13 քաղաքացի հոսպիտալացվել էր։
Վթարից 4 օր անց հիվանդանոցում մահացել էր նաեւ 20-ամյա Ծաղիկ Համբարձումյանը:
- Վթարից տուժած 35-ամյա կինը Սուրենավանից է, նա Արարատից վերադառնալիս է եղել (ֆոտո)
- 21-ամյա կինը մահացել է, ամուսինը ծանր վիրավոր է. մանրամասներ ողբերգական վթարից (ֆոտո)