Բրիտանիայում 50 ֆունտ սթերլինգ արժողությամբ նոր թղթադրամի վրա կհայտնվի բրիտանացի մաթեմատիկոս եւ գաղտնագիր Ալան Թյուրինգի դիմանկարը, հայտնել է Անգլիայի բանկի ղեկավար Մարտ Կառնին, հաղորդում է «ՌԻԱ Նովոստին»:
50 ֆունտ սթերլինգ թղթադրամի վրա պատկերվող պատմական անձի ընտրության մրցույթը հայտարարվել էր 2018-ի նոյեմբերին: Նոր թղթադրամները շրջանառության մեջ կհայտնվեն 2021 թվականի վերջին:
Սա կլինի նոր դրամանշանների շարքում վերջին թղթադրամը, որը պատրաստված է պոլիմերիային նյութերի օգտագործմամբ:
Սպասվում է, որ 2020-ին 20 ֆունտ արժողությամբ պլաստիկ թղթադրամներ կթողարկվեն:
«Ալան Թյուրինգը նշանավոր մաթեմատիկոս է, որի աշխատանքը էականորեն ազդել է մեր այսօրվա ապրելակերպի վրա:
Համակարգչային գիտության եւ արհեստական ինտելեկտի հայրը, պատերազմի հերոսը բեկումնային եւ երկարատեւ ներդրում է ունեցել (Բրիտանիայի զարգացման մեջ)», - ասել է Կառնին ներկայացնելով մրցույթի արդյունք ները:
Թյուրինգը մասնավորապես հայտնի է նրանով, որ մաթեմատիկոսների խմբի կազմում կարողացել է Երկրորդ համաշխարհային պատերազմի ժամանակ կոտրել գերմանական զինված ուժերի գաղտնագրերը:
2017-ի սեպտեմբերին Անգլիայի բանկը շրջանառության մեջ էր դրել պոլիմերային նյութերից պատրաստված նոր 10 ֆունտ արժողությամբ թղթադրամ: Մեկ տարի առաջ շրջանառության մեջ էր դրվել պլաստիկ 5 ֆունտ արժողությամբ թղթադրամը, որի պատրաստման ժամանակ կենդանական ճարպեր էին օգտագործվել:
Այս փաստը Բրիտանիայում սկանդալ էր առաջացրել, վեգանները եւ որոշ կրոնական խմբերի ներկայացուցիչները Անգլիայի բանկին կոչ էին արել հրաժարվել նման թղթադրամների թողարկումից:
