Ֆեյսբուքի նախատեսած Libra կրիպտոարժույթը Վաշինգտոնում բախվել է դիմակայության պատին, ինչը կարող է խանգարել դրա գործարկմանը, բայց վերլուծաբաններն ասում են, որ կրիպտոարժույթը, հավանաբար, կհասնի հաջողության ամբողջ աշխարհում, գրում է AFP-ն։
Ֆեյսբուքի եւ նրա գործընկերների պլանը թերահավատություն է առաջացրել ամերիկյան օրենսդիրների եւ G7-ի ֆինանսների նախարարների, ինչպես նաեւ աշխարհի կենտրոնական բանկերի ու կարգավորող մարմինների կողմից։
Օրենսդիրները մտահոգություն են հայտնել նաեւ տվյալների կոնֆիդենցիալության եւ պաշտպանության առիթով։
Ինչո՞ւ են նրանք դեմ Libra-ին
Ֆեյսբուքի մասշտաբը՝ մոտ 2,7 մլրդ օգտատեր, նշանակում է, որ առաջարկվող Libra արժույթը կարող է ձգել գլոբալ ֆինանսական համակարգը եւ բարդացնել աշխարհի կենտրոնական բանկերի աշխատանքը։
«Եթե մարդիկ Libra-ն օգտագործում են որպես կուտակված արժեք եւ դրանում շատ փող են պահում, դուք կարող եք ունենալ պակաս արդյունավետ դրամավարկային քաղաքականություն»,- կարծում է Պետերսոնի Միջազգային էկոնոմիկայի ինստիտուտի գիտաշխատող Մարթին Չորզեմփան։ Օրինակ, ԱՄՆ Դաշնային պահուստային համակարգը «կարող է ազդել դոլարի վրա, բայց չի կարող ազդել Libra-ի վրա նույն կերպ»։ Քանի որ Libra-ն, ավելի շուտ, կպահի դոլարը, եվրոն եւ մյուս հիմնական արժույթները որպես պահուստային ակտիվներ, ազդեցությունը կարող է լինել զգալի «զարգացող շուկաներում կամ զարգացող երկրներում, որտեղ մարդիկ ցանկանում են ազատվել այդ արժույթներից»,- ասել է Չորզեմփան։
«Պատկերացրեք Libra-ի պահանջարկն այնպիսի տեղում, ինչպիսին Վենեսուելան է», որտեղ արժույթը փլուզվել է հիպերինֆլյացիայից։
Վիրտուալ այլ արժույթների տատանումներից խուսափելու հույսով Libra-ն կկառավարվի ոչ առեւտրային ասոցիացիայի կողմից, որը դրամն ամրապնդում է հիմնական համաշխարհային արժույթների զամբյուղով։
Լամոնթ Բլեքը՝ DePaul համալսարանի ֆինանսների պրոֆեսոր, ասել է, որ Ֆեյսբուքը դեռ լրիվ չի բացատրել, թե ինչպես է աշխատելու Libra ասոցիացիան, որը հաշվում է 100 անդամ։ «Դա իսկապես կենտրոնական բանկի դեր է կատարելու»,- ասել է Բլեքը։
Կարո՞ղ են արդյոք Libra-ն գործարկել 2020 թվականին
Libra, ամենայն հավանականությամբ, գործունակ չի լինի, համենայնդեպս, ԱՄՆ շուկայի համար, կարծում է կրիպտոարժույթի գծով վերլուծաբան եւ ներդրող Լու Քերները։
«Չափից ավելի շատ են կարգավորող մարմինները եւ կառավարական հաստատությունները՝ պոտենցիալ հսկողական պարտավորություններով, չափից շատ է անվստահությունը Libra-ի հանդեպ, թե ինչ կլինի այն, եւ չափից ավելի քիչ են գիտելիքներն այս թեմայի վերաբերյալ, որպեսզի հնարավոր լինի հասնել կոնսենսուսի իրավանորմատիվային բազայի առումով»։
Նրա խոսքով՝ ԱՄՆ կառավարությունը ցանկանում է, որպեսզի դոլարը դառնա համաշխարհային պահուստային արժույթ, եւ կդիմակայի ցանկացած «սպառնալիքի»։
ԱՄՆ ֆինանսների նախարար Սթիվեն Մնուչինն ասել է, որ Ֆեյսբուքը պետք է համապատասխանի «շատ բարձր չափորոշիչների, նախքան ֆինանսական համակարգի հասանելիություն ստանալը»։ G7-ի ֆինանսների նախարարները նշել են, որ անհրաժեշտ է այս շաբաթ տեղի ունենալիք հանդիպման ժամանակ արտահայտվել Libra-ի առնչությամբ։
Իսկ մյուս կրիպտոարժույթնե՞րը
Ֆեյսբուքը պնդում է, որ շատ փորձագետներ համակարծիք են, որ եթե Libra-ն անհաջողություն կրի, մյուս թվային արժույթները թափ կհավաքեն, այն, ինչ արդեն տեղի է ունենում։
«Եթե մենք չկարողանանք գործել, ապա շուտով կտեսնենք, որ թվային արժույթը վերահսկում են ուրիշները, որոնց արժեքները կտրուկ տարբերվում են»,- օրենսդիրներին ասել է Դավիթ Մարկուսը՝ Ֆեյսբուքի նախաձեռնության ղեկավարը։
Չորզեմփայի խոսքով՝ չինական «ֆինտեխ» ընկերություններն արդեն աշխատում են շատ շուկաներում՝ Բրիտանիայից մինչեւ Հարավարեւելյան Ասիա։
«Եթե ԱՄՆ կարգավորող մարմիններն արգելեն այնպիսի նախագծեր, ինչպիսին է Libra-ն կամ հետաձգեն դրանք անպետք կանոնների պատճառով, «չինական ֆինտեխի համար ճանապարհ կբացվի աշխարհում իր տիրապետությունն ընդլայնելու համար»,- գրել է նա։
Չորզեմփան ասել է, որ չինական WeChat-ը եւ Alipay-ը օգնել են ստեղծել «անկանխիկ հասարակություն, որտեղ մարդիկ իրենց հավելվածներն օգտագործում են ամեն ինչի համար, այն դեպքում, երբ ամերիկացիները նախկինի պես օգտագործում են միլիարդավոր չեքեր եւ կրում են պլաստիկ քարտեր»։
Ի՞նչ է լինելու հիմա
Քերները կարծում է, որ կրիպտոարժույթները կաճեն անկախ նրանից՝ հավանություն կտան արդյոք կարգավորիչները Libra-ին եւ բիթքոինը կարող է դե ֆակտո համաշխարհային արժույթ դառնալ:
«Նրանք չեն կարող կանգնեցնել դա», - ասել է նա:
Կրիպտոարժույթի հայտնվումը հիմնված է մոնետար իշխանությունների նկատմամբ անվստահության հետ եւ Քերները պնդում է, որ Libra-ի արգելքը չի կանգնեցնի այդ միտումը:
Facebook-ը, նշում է նա, թույլտվություն եւ կարգավորում է խնդրել, իսկ մյուսները՝ ոչ:
«Ամեն ինչ հիմնված է հավատի վրա, դոլարը հիմնված է հավատի վրա», - ասել է նա:
«Մարդիկ հավատում են այնքան ժամանակ, մինչեւ որ դադարում են: Կառավարությունները այնքան փող են տպում, որքան ուզում են եւ դա մեծամասամբ խեղաթյուրում է փողերը»:
Բլեք Դեպոլան խոստովանել է, որ ԱՄՆ-ն հետ է մնում Չինաստանից այդ ոլորտում, սակայն զգուշացրել է արդյունքում չափազանց արագ զարգացումից:
«Նորարարություններն իրենց բնույթով բավականին ռիսկային են», -ասել է նա:
«Հուսով եմ, որ ուսումնասիրման այս գործընթացը մեզ կօգնի հասկանալ, թե ինչպես կարող են այս նորարարությունները կատարելագործվել եւ բարելավվել»:
Թիմոտի Մասսադը՝ ԱՄՆ-ի ֆինանսների նախարարի նախկին օգնականը եւ Քենեդիի Հարվարդի դպրոցի ներկայիս գիտաշխատողը կարծում է, որ Facebook-ի հարցում անորոշությունը ընդգծում է կարգավորիչ պարամետրերի անհրաժեշտությունը թվային ակտիվների ընդգրկման համար, այդ թվում Libra-ի, բիթքոինների եւ այլն:
«Ֆինանսական նորարարությունները գեներացնում են արտադրանքները եւ համակարգերը: Դա գերազանցում է գոյություն ուենցող նորմատիվա-իրավական բազան, որը կարող է հարմարավետություն առաջարկել եւ նվազեցնել ծախսերը, սակայն դա չի նշանակում, որ դրանք նույնպես ռիսկային չեն», - ասել է Մասսադը:
