Հնդկական տիեզերական հետազոտությունների կազմակերպությունը (ISRO) հաջողությամբ Լուսին է ուղարկել «Չանդրայան - 2» ավտոմատ արշավախումբը» ՝ ոչ մեծ լուսնագնացով, տեղեկացնում է ՌԻԱ «Նովոստի»-ն։
Առաքելության մեկնարկը նախատեսված էր հուլիսի 15-ին, բայց տեխնիկական անսարքությունների պատճառով հետաձգվել է։ Դրանց բնույթը պաշտոնապես չի նշվել։ Մի շարք ԶԼՄ-ներ, հղում կատարելով սեփական աղբյուրներին, գրել են GSLV Mk III հրթիռ-կրիչի վառելիքային հատվածի անսարքության մասին։
«Չանդրայան – 2» առաքելությունը շարունակում է հնդկական լուսնային ծրագիրը, որն սկսվել է 2008-ի հոկտեմբերին «Չանդրայան – 1» սարքով։ Այն Լուսնի ուղեծրում աշխատել է 312 օր եւ արբանյակի մակերես ուղարկել հարվածային սարք։
«Չանդրայան – 2»-ն ավելի բարդ նախագիծ է, քանի որ նախատեսում է Լուսնի վրա վայրէջք։ Մեկ լուսնային օրվա ընթացքում (14 երկրային օր) լուսնագնացը կուսումնասիրի արբանյակի մակերեսի հանքաբանական եւ տարրերի կազմը։
Սկզբում նախատեսվում էր, որ արշավախումբը Լուսին կուղարկվի 2018-ի ապրիլին. հետո մեկնարկը նշանակեցին հոկտեմբերին, այնուհետեւ՝ 2019-ի հունվարին, ապրիլին եւ մայիսին։ Տեղափոխումների պատճառների մասին պաշտոնապես չէր նշվում։
«Չանդրայան – 2»-ի հաջողության դեպքում Հնդկաստանը կդառնա աշխարհում չորրորդը (ԱՄՆ-ի, Ռուսաստանի եւ Չինաստանի կողքին), որը կնշի իր ներկայությունը Երկրի արբանյակի վրա։
