Անսովոր լոտեր են վաճառքի հանվել հանրահայտ կայքերից մեկի ինտերնետ-աճուրդում։ Այժմ բոլոր ցանկացողները կարող են ձեռք բերել Ուկրաինայի նախագահ Վլադիմիր Զելենսկու կիսանդրին։ Իհարկե, գիպսե այս կիսանդրու գինը բնավ դեմոկրատական չէ։ Դրա դիմաց առաջարկում են վճարել 2 հազար գրիվնա, տեղեկացնում է «Ուկրաինսկիե նովոստի»-ն։

Հայտարարությունում ասվում է, որ «պաշտոնական վաճառքը» Ուկրաինայում մեկնարկելու է հուլիսի 25-ին։ Կիսանդրին, հայտարարության հեղինակի պնդմամբ, կշռում է 2,5 կիլոգրամ, բարձրությունը 23 սանտիմետր է։

«Հիանալի եւ եզակի նվեր է, շատ լավ կզարդարի ձեր աշխատասեղանը եւ ինտերիերը։ Ուկրաինայում պաշտոնական վաճառքը կմեկնարկի հուլիսի 25-ին, ձեռք բերեք ամենահարմար գնով հենց հիմա։ Պատրաստված է գիպսից, 3 շերտ լաքապատված նրբաթերթ ոսկով։ Ներկայացված է երեք գույնով՝ մարմար, փղոսկր փայլուն, փղոսկր անփայլ»,- ասվում է հաղորդագրությունում։

Զելենսկու կիսանդրու հայտնվելը չի կարող չզարմացնել. ավելի վաղ ինքը՝ Ուկրաինայի նախագահն էր ասել, որ իր դիմանկարները չպետք է կախված լինեն պաշտոնյաների աշխատասենյակներում։

«Նախագահը սրբապատկեր չէ, կուռք չէ, նախագահը դիմանկար չէ։ Այնտեղ (աշխատասենյակների պատերին) կախեք ձեր երեխաների լուսանկարները եւ ամեն որոշումից առաջ նայեք նրանց աչքերին»,- ժամանակին ասել էր Զելենսկին։