Գերմանիան պետք է շարունակի ավելացնել ռազմական ծախսերը: Այս մասին հայտարարել է Գերմանիայի պաշտպանության նոր նախարար Աննեգրետ Կրամպ-Կարրենբաուերը` ընդգծելով երկարաժամկետ նպատակների իրագործման հանձնառությունը: Նա հայտարարել է, որ երկրի անվտանգության կարիքները պահանջում են ավելի շատ միջոցներ, եւ այս քայլը պարզապես պատասխան չէ օտարերկրյա պետությունների ճնշմանը, հաղորդում է AP-ն:
2014 թվականին ՆԱՏՕ-ի անդամները համաձայնել էին ձգտել 2024 թ.-ին ավելացնել պաշտպանական ծախսերը ՀՆԱ-ի մինչեւ 2 տոկոսի չափով, չնայած Գերմանիան արդեն հայտարարել է, որ չի ակնկալում այդ նպատակի իրագործումը: ԱՄՆ-ն քննադատել է Բեռլինի ծախսերը:
Աննեգրետ Կրամպ-Կարրենբաուերը նշել է, որ նա մտադիր է հասնել 2 տոկոս նպատակին եւ Գերմանիան պետք է 2024-ին պաշտպանական ծախսերը հասցնի ՀՆԱ-ի մինչեւ 1.5 տոկոսի:
Նրա խոսքով՝ Գերմանիան կա եւ մնալու է «հուսալի դաշնակից», սակայն 1,5 տոկոսի նպատակն արտացոլում է «մեր նվազագույն կարիքները»:
Ակնկալվում է, որ Գերմանիայի ռազմական ծախսերն այս տարի կկազմեն ՀՆԱ-ի 1,35 տոկոսը՝ 2018 թվականի 1,23 տոկոսի համեմատ: