Հուրգադա-Երեւան չվերթի չեղարկման պատճառով Հայաստան չեկած մոտ 100 ՀՀ քաղաքացիները դեռ Հուրգադայում են: Նրանց շարքում է ՀՀ քաղաքացի Վարդան Այվազյանը, որի հետ կապ է հաստատել «Փաստինֆոն»:
Նա պատմեց, որ տուրօպերատորը դիմել է հյուպատոսին՝ իրենց սննդով եւ գիշերակացով ապահովելու համար, սակայն հյուպատոսարանը մերժել է, եւ իրենք այս պահին տուրօպերատորի հաշվին են գտնվում հյուրանոցում:
«Իհարկե, շատ զզվելի պայմաններ են, բայց փողոցում մնալուց ավելի լավ է: Ինտերնետ միայն սպասասրահում կա, եւ առավոտյան 6-ից սպասասրահում նստած ենք, որպեսզի ամեն վայրկյան ինֆորմացիա կարողանանք ստանալ»,-ասել է քաղաքացին ու նշեց, որ անգամ հանգստանալու հնարավորություն չկա, քանի որ, եթե գնան սենյակ, հետ կմնան տեղի ունեցող իրադարձություններից:
Վարդան Այվազյանի խոսքով, Հուրգադայում մնացած քաղաքացիներն իրենց խաբված եւ ստորացված են զգում. «Եգիպտացիները շատ հյուրընկալ ու բարեհամբույր են, բայց մեզ խաբված ու ստորացված ենք զգում, բարոյապես ընկճված ենք: Կվերադառնանք Հայաստան եւ համապատասխան դատական պրոցեսներ կսկսենք»:
