Հայաստանի իշխանությունները պետք է պատասխանատվության ենթարկեն Եգիպտոսում քաղաքացիների հանգստի խափանման մեղավորներին: Հուլիսի 30-ին լրագրողների հետ հանդիպման ժամանակ այս մասին ասաց Տուրիզմի հայկական ֆեդերացիայի նախագահ Մեխակ Ապրեսյանը:
Նրա գնահատմամբ՝ Հայաստանի զբոսաշրջության ոլորտում բիզնես միջավայրը սպառնալիքի ներքո է, եւ այս խնդիրը պետք է լուծել օրենսդրական մակարդակում: «Ոչ բոլոր տուրիստական ընկերություններն են հաճախորդի հետ համապատասխան պայմանագիր կնքում, որում պետք է հստակ նշվեն երթուղու սկիզբը եւ վերջը, կեցության պայմանները, սնունդի կազմակերպումը, ինչպես նաեւ ամրագրման չեղարկման հնարավորությունը: Խնդիր է նաեւ այն, որ ոչ բոլոր հաճախորդներն են այդ պայմանագիրը պահանջում»,- նշեց նա:
Տուրիզմի հայկական ֆեդերացիայի նախագահը պարզաբանեց, որ գործող օրենքով նախատեսվում է, որ եթե պայմանագիր կնքված չէ կամ պայմանագրում բացակայում է օրենքի դրույթներից մեկը, ապա հաշվի է առնվում սպառողի գրավոր բացատրությունը, եւ տուրօպերատորը հայտնվում է պակաս շահեկան վիճակում:
Նրա համոզմամբ՝ համանման խնդիրների լուծման համար անհրաժեշտ է ընդունել զբոսաշրջության մասին նոր օրենք, որի նախագիծն արդեն կա եւ պետական ու մասնավոր շրջանակներում քննարկվել է դեռեւս մինչեւ հեղափոխությունը: «Պետք է ընդամենը այն վերջնամշակել եւ Կառավարություն ներկայացնել: Անհրաժեշտ է լիցենզիաներ մտցնել, որոնցից տուրօպերատորները կզրկվեն օրենքի դրույթներին կամ պայմանագրի պայմաններին չհետեւելու դեպքում: Օրինագծով առաջարկվում է նաեւ հաճախորդների համար լրացուցիչ ֆնանսական երաշխիքներ սահմանել, եթե տուրընկերության մոտ ինչ-ինչ խնդիրներ առաջանան»,- հավելեց նախկին պաշտոնյան:
Նա նշեց, որ ներկայիս օրենքը, որն ընդունվել է 15 տարի առաջ, կատարել է իր գործառույթները եւ արդեն չի համապատասխանում ժամանակի պահանջներին:
«Ներկայիս օրենքն ընդունվել է ձեւավորվող ոլորտը հաշվի առնելով, երբ անհրաժեշտ էր ընկերություններին որոշակի ազատություն տրամադրել զարգացման համար: Սակայն հիմա իրավիճակը փոխվել է, տարբեր տնտեսվարող սուբյեկտներ են հայտնվել, ինչպես բարեխիղճ, այնպես էլ ոչ այնքան, այդ թվում նաեւ արտասահմանյան:
Անբարեխիղճ ընկերությունների գործունեությունը կարող է լրջորեն հարվածել երկրի հեղինակությանը:
Տուրզմի ոլորտը ոչ միայն տնտեսական նշանակություն ունի, այն նաեւ օտարերկրացիների մոտ որոշակի պատկերազցում է ստեղծում երկրի մասին», - ասաց հկ ղեկավարը՝ հավելելով, որ քանի դեռ օրենքն ընդունված չէ, քաղաքացիները պետք է հատուկ զգոնություն դրսեւորեն եւ օգտվեն այն ընկերությունների ծառայություններից, որոնք հաշվի են առնում եւ հարգում են նրանց իրավունքները:
«Բացի այդ հարկավոր է կողմնորոշվել նրանով, թե ինչ հեղինակություն ունի այս կամ այն ընկերությունը: Այն ընկերությունները, որոնք իրենց բացասական կողմից են դրսեւորում, բացառվում են մեր Դաշնության ցանկից», - ասաց Մեխակ Ապրեսյանը:
Հիշեցնենք, որ ՀՀ ԱԳՆ-ն հայտնել էր, որ հինգշաբթի N3703 Հուրգադա-Երեւան ավիաչվերթի չեղարկման պատճառով ավելի քան հարյուր հայ զբոսաշրջիկներ մնացել էին Եգիպտոսում եւ չէին կարողանում վերադառնալ հայրենիք:
Կառավարության կողմից ֆինանսավորված UJ5600 չվերթը քաղաքացիներին հայրենիք էր վերադարձրել: