«Հայբիզնեսբանկ» ՓԲԸ-ն արդեն երրորդ անգամ մեծ սիրով մասնակցեց «Հաշտ Ճամբար» ծրագրին, որի նախաձեռնողն էր Ֆինանսական համակարգի հաշտարարի գրասենյակը:
«Հայբիզնեսբանկը» «Հաշտ ճամբար» ծրագրի շրջանակներում այցելեց Հանքավանում եւ Ծաղկաձորում գտնվող ճամբարներ, որտեղ իրենց ամառային հանգիստն էին անցկացնում մինչեւ 13 տարեկան անապահով ընտանիքների երեխաները:
Բանկի աշխատակիցները երեխաների հետ խաղացին ֆինանսական խաղեր, բացատրեցին թե ինչ է գումարը եւ ինչպես պետք է այն ճիշտ տնօրինել՝ պլանավորելով ծախսերը, ինչից հետո խաղում էին խաղ, երեխաների գիտելիքներն ամրապնդելու համար:
Ֆինանսական համակարգի հաշտարարի գրասենյակի նախաձեռնության շնորհիվ երեխաները ծանոթացան ֆինանսական համակարգի կազմակերպությունների գործունեությանը, ֆինանսական թեմայով խաղեր խաղացին, սովորեցին ինչ է արժույթը, ծանոթացան արտարժույթի թղթադրամներին, եւ պատկերացում կազմեցին ինչպես կարելի է կատարել արտարժույթի փոխանակում, իսկ Կենտրոնական բանկի մասնագետները փորձում էին հատուկ խաղերի միջոցով երեխաներին ծանոթացնել ֆինանսական բառերին եւ դրանց նշանակությանը:
«Հայբիզնեսբանկը» մշտապես կարեւորում է ապագա սերնդի տեղեկացված եւ կրթված լինելու հանգամանքը, քանզի նրանց հետ միասին է կերտվում ապագայի հուսալի ճանապարհը։
