Բանակում կոռուպցիայի վերացումը կնպաստի բանակի մարտունակության բարձրացմանը: Այս մասին այսօր` օգոստոսի 3-ին, հրավիրված մամուլի ասուլիսի ժամանակ ասաց հոգեբան Սամվել Խուդոյանը:
«Կոռուպցիոն էդ համակարգը վերացնելը, էդ ֆինանսները ահռելի, որ ուտվում էր, էդ բոլորը մարտունակության բարձրացման համար է, որովհետեւ էդ փողը գնում է զինվորին, գնում է բանակին, գնում է զենքին»,- ասաց նա:
Հոգեբանը նշեց, որ այս տարի զորակոչից բողոքներ չի ստացել, նրա խոսքով մի քանի տարի առաջ այս ոլորտը խիստ հսկողության տակ էր գտնվում, բայց էլի լինում էին դեպքեր, որ երիտասարդներին «սարսափելի գներով ազատում էին ծառայությունից»:
Հետախույզ Վովա Վարդանովն էլ ասաց, որ նախորդ իշխանության օրոք ընդունված օրենքներն այս իշխանությունների օրոք են աշխատում:
«Նենց չի, որ այսօրվա իշխանություններն են այդ օրենքների հեղինակը, բայց այսօրվա ռազմաքաղաքական եւ քաղաքական էլիտան է նպաստում ներկա արդյունքներին: Ճիշտ է` կոռուպցիայի դեմ պայքարը լուրջ ալիք չի բարձրացնում, համենայնդեպս լուրջ գործեր չեն երեւում, բայց իրենց էդ մանր ալիքի հաստատուն ազդեցությունը երեւում է, գոնե ասենք բանակում զգացվում է»,- ասաց նա:
Հետախույզի կարծիքով` պետք է խստացնել բանակում կոռուպցիայի պատժաչափերը:
«Ենթադրենք վառելիք են գողանում, դա նշանակում է, որ բանակի էս հատվածում գողության միջոցով դավաճանության աստիճանի վնաս է հասցվում, եւ այդ պատճառով շատ խիստ պետք է լինի բանակում կանխամտածված հանցագործությունները, շատ խիստ»,- հավելեց նա:
