Իսրայելի Թել Ավիվ քաղաքի քաղաքապետարանի շենքի ճակատամասը անցած գիշեր լուսավորվել է ԱՄՆ դրոշի գույներով՝ որպես սգո նշան ամերիկյան քաղաքներում զինված հարձակումների տասնյակ զոհերի, փոխանցում է «ՌԻԱ Նովոստի»-ն:
Տեխաս նահանգի Էլ Պասո քաղաքի առեւտրի կենտրոնում հրաձգությունը շաբաթ խլել էր 20 մարդու կյանք, եւս 10-ը, այդ թվում՝ հրաձիգը, նման հանգամանքներում էին զոհվել Օհայո նահանգի Դեյթոն քաղաքում:
«Թել Ավիվի քաղաքապետարանի շենքը լուսավորվել է Միացյալ Նահանգների դրոշի գույներով Դեյթոնում եւ Էլ Պասոյում սարսափելի հրաձգություններից հետո: Մեր մտքերն ու աղոթքները ԱՄՆ ժողովրդի հետ են, բոլորի հետ, ովքեր տուժել են այդ հարձակումների ժամանակ»,- հայտնել են քաղաքապետարանից:
Համերաշխության նման դրսեւորումը ավանդույթ է դարձել Իսրայելի մեծությամբ երկրորդ քաղաքի համար, որը նրա գործարար մայրաքաղաքն է եւ ամենահայտնի միջերկրածովյան հանգստավայրը: Ի պատասխան արտասահմանում խոշոր ահաբեկչությունների՝ Թել Ավիվի քաղաքապետարանի շենքի ճակատամասն արդեն լուսավորվել է իսպանական, ֆրանսիական, եգիպտական, բրիտանական դրոշների գույներով եւ ռուսական եռագույնով:
Իսրայելի կառավարության եւ ժողովրդի անունից նախօրեին ցավակցություն էր հայտնել երկրի վարչապետ Բենյամին Նեթանյահուն: «Ես ցավակցություն եմ հղում ընտանիքներին, որոնք կորցրել են հարազատներին, առողջանալու մաղթանքներ վիրավորներին եւ համերաշխություն եմ հայտնում ամերիկացի ժողովրդի վշտին»,- ասել է նա: