ԱՄՆ նախագահ Դոնալդ Թրամփը կոչ է արել զենքի գնորդների նախնական ստուգման մասին օրենք ընդունել, հաղորդում է «ՌԻԱ Նովոստի»-ն:
«Չենք կարող թույլ տալ, որ Տեխասում եւ Օհայոյում մարդիկ զուր մահանան: Մենք դա երբեք չենք մոռանա: Հանրապետականներն ու դեմոկրատները պետք է միավորվեն զենքի գնորդների նախնական ստուգման մասին օրենք ընդունելու շուրջ»,- Twitter-ում գրել է Թրամփը:
ԱՄՆ նախագահը հավելել է, որ «այդ երկու ողբերգական իրադարձությունները պետք է ինչ-որ լավ բանի հանգեցնեն»:
Հիշեցնենք, որ շաբաթ օրը հրաձգություն է տեղի ունեցել Տեխաս նահանգում Walmart խանութում: Հարձակման արդյունքում 20 մարդ է զոհվել, 26-ը՝ վիրավորվել: Նրանցից շատերը ծանր վիճակում են: Տեխասի նահանգապետ Գրեգ Էբբոտտի խոսքով՝ հրաձգություն կազմակերպած անձին բռնելու օպերացիան տեւել է 21 րոպե: Ավելի ուշ մեկ այլ միջադեպ է տեղի ունեցել Օհայո նահանգում, ինչի արդյունքում 10 մարդ է զոհվել, եւս 27-ը վիրավոր է: Ոստիկանությունը հայտնել է, որ հրաձիգը ոչնչացվել է 1 րոպեում: