Հարավաֆրիկյան ռոբոտացված WASP-South աստղադիտակն աստղագետներին թույլ է տվել «տաք Յուպիտեր» դասի միանգամից 4 էկզոմոլորակ հայտնաբերել: Նոր արտաքին մոլորակներից մեկը գիտությանը հայտնի ամենատաք մոլորակներից է համարվում, գրում է Planet Today-ը:
2006թ. աշխատանքի սկզբից SuperWASP ծրագիրը, որին մասնակցում է 2 ռոբոտացված աստղադտակ, ավելի քան 150 էկզոմոլորակ է հայտնաբերել: Աստղադիտակները հետեւում են միլիոնավոր լուսատուներին եւ մոլորակներ հայտնաբերում դրանց ուղեծրում անցումային ֆոտոմետրիայի մեթոդով: Այժմ ծրագրի շրջանակում փնտրում են հիմնականում «տաք Յուպիտերներ»: Այդ տեսակի մոլորակները հեշտ է հայտնաբերել, քանի որ դրանք սովորաբար տեղակայված են աստղերին մոտ եւ ունեն ոչ մեծ ուղեծրային ժամանակաշրջաններ:
4 նոր էկզոմոլորակները ստացել են WASP-178b, WASP-184b, WASP-192b եւ WASP-185b անվանումները:
Դրանցից ամենահետաքրքիրը WASP-178b-ն է: Այն, Քիլլի համալսարանի աստղագետ Քոել Հելլիերի խոսքով, իր դասի ներկայացուցիչների շրջանում ամենատաքն է:
«Դրա ջերմաստիճանը հասնում է 2,5 հազար կելվինի, այսինքն՝ ամենատաք էկզոմոլորակն է: Նման բարձր ջերմաստիճանը պայմանավորված է մոլորակի եւ աստղերի միջեւ ոչ մեծ հեռավորությամբ. մոլորակը գտնվում է լուսատուից ընդամենը 0,056 աստղագիտական միավոր հեռավորության վրա եւ դրա շուրջը պտտվում է 3,3 երկրային օրվա ընթացքում»,- ասում է աստղագետը՝ հավելելով, որ հետաքրքիր էկզոմոլորակի զանգվածը կազմում է Յուպիտերի 1,66 զանգվածը: