Մոլորակի խոշորագույն ներդրումային բանկերը գործարքների ծավալների կրճատման եւ արագորեն տեմպ հավաքող ավտոմատացման հետեւանքով նախատեսում են կրճատել մոտ 30 հազար աշխատակիցների, հայտնում է Financial Times-ը:
Առաջին հերթին Եվրոպայում վերակազմավորման շրջանակում կրճատումների մասին ընթացիկ տարվա ապրիլին հայտարարել են բրիտանական բանկեր HSBC-ն եւ Barclays-ը, ֆրանսիական Societe Generale-ը, գերմանական Deutsche Bank-ը եւ ամերիկյան ֆինանսական կոնգլոմերատ Citigroup-ը: «Ակնհայտ է, որ բանկային-ներդրումային ծառայություններից եկամուտների հեռանկարները ավելի ու ավելի են դժվարանում»,- ասել է Berenberg բանկի վերլուծաբան Էնդրյու Լոուն: - Ներդրումային բանկերը դժվարությամբ են փող վաստակում զրոյական կամ բացասական տոկոսադրույքների պայմաններում»:
2018 թվականին տասնյակ առաջատար համաշխարհային բանկերի ֆինանսական եկամուտներից, արժույթի եւ բորսայական ապրանքների վաճառքից շահույթը նվազել է մինչեւ 2006 թվականի մակարդակ: Ներդրումային բանկերը «բախվում են եկամուտմների ոլորտում կառուցվածքային փոփոխությունների անհրաժեշտության հետ», արձանագրում է Keefe, Bruyette & Woods ընկերության վերլուծաբան Էդ Ֆերթը:
Դրանից բացի, ինչպես հիշեցնում է պարբերականը, ֆինանսական ինստիտուտները պատրաստվում են 2022 թվականին, այսպես կոչված, «Բազել IV» կանոնների ուժի մեջ մտնելուն, որոնք բանկերի կապիտալին ներկայացվող պահանջները կբարձրացնեն ըստ ռիսկի հավասարակշված ակտիվների մեծության վերահաշվարկման միջոցով: Պահանջվող կապիտալի մեծացումը շատ բանկերի համար գործարքներն ավելի պակաս շահավետ կդարձնի:
Ամենախոշոր կրճատումների մասին ընթացիկ ամսում հայտարարել է գերմանական Deutsche Bank-ը, որը մտադիր է կրճատել մոտ 18 հազար աշխատակցի: Ծրագրած վերակազմավորումը հաշվարկված է մինչեւ 2022 թվականի վերջը: Դա Deutsche Bank-ին կարժենա մոտ 7,4 մլրդ եվրո: Deutsche Bank-ը անդրազգային կարեւորագույն բանկերից մեկն է, ներկայացուցչություն ունի ավելի քան 70 երկրում: