Կալիֆոռնիայում փոխհրաձգության ժամանակ 4 մարդ, նրանց թվում 2 ոստիկան են վիրավորվել, եւս մեկ իրավապահ զոհվել է, հարձակվողը վնասազերծվել է, հայտնել է ոստիկանության տեղական վարչությունը, փոխանցում է «ՌԻԱ Նովոստի»-ն:
Դիմակայությունը տեղի է ունեցել Լոս Անջելեսից արեւելք գտնվող Ռիվերսայդ քաղաքում: Այն սկսվել է, երբ ոստիկանը կանգնեցրել է մեքենան եւ սկսել այն ստուգել: Մեքենայի վարորդը դուրս է բերել հրացանը եւ ոստիկանի վրա կրակելով՝ նրան պատճառել բազմաթիվ վնասվածքներ, որոնց հետեւանքով նա մահացել է: Օգնության հասած 3 ոստիկաններից երկուսը վիրավորվել են, նրանցից մեկը կրիտիկական վիճակում է: Թեթեւ վիրավորումներ են ստացել 2 քաղաքացիական անձինք: Ի վերջո, դեպքի վայր են եկել ոստիկանության խոշոր ուժեր եւ հարձակվողին վնասազերծել:
Զոհված ոստիկանը 34 տարեկան էր, հարձակվողը՝ 49, նրա անձը պարզվել է:
Փոխհրաձգությունը տեղի է ունեցել բանուկ մայրուղում, եւ կարող էր տուժածների թիվն ավելի մեծ լինել: Տեղի բնակիչ Ջենիֆեր Մոկտեսուման Los Angeles Times-ին հայտնել է, որ տուն էր տանում իր երկվորյակներին, երբ փամփուշտը ծակել է մեքենայի դիմապակին: Նրա հետեւից ընթացող պահեստազորի ծովային հետեւակը օգնել է մորն ու ու երեխաներին սողալ կամրջի տակ եւ փոխհրաձգությունից փրկվել:
