Կառավարության այսօր՝ օգոստոսի 15-ի հերթական նիստում ընդունվեց ՀՀ արդարադատության նախարար Ռուստամ Բադասյանի կողմից ներկայացված բանտային բժշկության ոլորտում բարեփոխումների վերաբերյալ օրենքի նախագծերի փաթեթ:

«Նախագծերի փաթեթով առաջարկվում են հետեւյալ փոփոխությունները՝

Կալանավորված անձանց եւ դատապարտյալների բժշկական օգնությունը եւ սպասարկումն իրականացվելու է «Քրեակատարողական բժշկության կենտորն»ՊՈԱԿ–ի կողմից։

Կալանավորված անձանց եւ դատապարտյալներին տրամադրվող արտահիվանդանոցային, ներառյալ շարունակական հսկողության, հիվանդանոցային բժշկական օգնության եւ սպասարկման ծավալն ու բովանդակությունը համապատասխանեցնել քաղաքացիների համար նախատեսված պետության կողմից երաշխավորված բժշկական օգնության եւ սպասարկման ծավալին։

Հատկանշանական է, որ կալանավորված անձինք եւ դատապարտյալները կցագրվելու են ՔԿՀ–ին տարածքային առումով ավելի մոտ գտնվող լիցենզավորված արտահիվանդանոցային ամբուլատոր պոլիկլինիկական բժշկական օգնություն եւ սպասարկում իրականացնող բժշկական հաստատությանը, որտեղ իրականացվելու են նեղ մասնագիտական ծառայություններ,այդ թվում լաբորատոր գործիքային հետազոտությունները։

Դյուրինացվում են դատապարտյալների ուղեգրումը քաղաքացիական բժշկական հաստատություններ՝ այն կազմակերպելով բացառապես բժիշկների կողմից տրված ուղեգրերի վրա։

Սահմանվում է  կալանավորված անձի եւ դատապարտյալի կողմից սեփական միջոցներով բժշկական օգնություն եւ սպասարկում ստանալու կարգը։ Միջազգային չափանիշների համապատասխան՝  նախատեսվել է, որ յուրաքանչյուր կալանավորված անձ եւ դատապարտյալ իրավունք ունի իր հաշվին եւ իր ընտրությամբ օգտվել քաղաքացիական բժշկական հաստատության բժիշկների մասնագիտական ծառայություններից, անկախ ՊՈԱԿ–ում, ներառյալ ՔԿՀ–ներում տրամադրվող բժշկական օգնության  նույնատեսակ ծառայությունների առկայության հանգամանքից։

Հատկանշանական  է, որ քաղաքացիական բժշկական հասատատության բժշկի կողմից արտահիվանդանոցային եւ հիվանդանոցային բժշկական օգնության եւ սպասարկման ծառայությունները կարող են տրամադրվել բժշկի կողմից բժշկական փաստաթղթերով հաստատված ցուցումների առկայության դեպքում, իսկ անհետաձգելի դեպքերում անկախ բժշկական փաստաթղթերում ցուցումների առկայության հանգամանքից, ուղեգրումների հիման վրա։

Հիվանդությունների դասակարգման միջազգային չափանիշին է համապատասխանեցվում պատիժը կրելուն խոչընդոտող ծանր հիվանդությունների ցանկը, առաջարկվում է այն տարածել կալանավորումը որպես խափանման միջոց ընտրելուն խոչընդոտող հիվանդությունների վրա»,–նշեց Բադասյանը։

Նախարարի խոսքով՝ ԱՆ–ին կից կստեղծվի բժշկական հանձնաժողով, որը կտրամադրի եզրակացություն ծանր հիվանդության հիմքով կալանքից կամ պատժից ազատելու վերաբերյալ։