Չեխ զույգը մասնակցել է մաքրման արարողությանը Բալիում տաճարի պղծումից հետո:
Սաբինա Դոլեզալովան եւ նրա ամուսինը՝ Զդենեկ Սլուկան, քննադատության են արժանացել, երբ տեսանյութ են հրապարակել, որում կինը ծիծաղելով բարձրացնում է շրջազգեստը, իսկ ամուսինը նրա մեջքի վրա սուրբ ջուր է լցնում:
Մեղքը քավելու համար զույգը հագել է ավանդական հագուստ եւ մասնակցել մաքրման արարողությանը, որն անցկացրել է հինդուիստ քահանան: Նրանք զղջում են հայտնել իրենց արարքի համար՝ խոստանալով այլեւս չկրկնել:
Տեսանյութը զույգը տեղադրել է Instagram-ում, որտեղ ունի մոտ 85 000 հետեւորդ: Տեսանյութի տակ մեկնաբանություններում գրել էին՝ «զզվելի է», եւ կոչ արել նրանց վռնդել Բալիից: «Նրանք սխալ են գործել՝ պղծելով մեր կղզին: Ցանկացած ոք, որը կխախտի մեր ավանդույթները, ստիպված կլինի մասնակցել մաքրման արարողությանը»,- AFP-ին ասել է սենատոր Արյա Վեդակարնան:
