Կանադայի արդարադատության նախկին նախարար Ջոդի Ուիլսոն-Ռեյբոուլդի գործունեությանը վերաբերող սկանդալի ընթացքում Կանադայի խորհրդարանի էթիկայի հանձնաժողովը եզրակացրել է, որ վարչապետ Ջասթին Թրյուդոն խախտել է շահերի բախման օրենքը:
«Վարչապետը ուղղակիորեն եւ իր բարձրաստիճան աշխատակիցների միջոցով տարբեր եղանակներով ազդել է տիկին Ուիլսոն-Ռեյբոուլդի վրա», - ասել է հանձնաժողովի ղեկավար Մարիո Դիոնը, հայտնում է DW-ն:
Սկանդալ Կանադայի կառավարությունում
Արդարադատության նախարար եւ գլխավոր դատախազ Ջոդի Ուիլսոն Ռեյբոուլդը 2019-ի սկզբին սեփական ցանկությամբ հրաժարական էր տվել: Արդեն դրանից հետո նա Համայնքների պալատի արդարադատության հանձնաժողովի անդամներին հայտնել էր իր վրա վարչապետ Թրյուդոյի գրասենյակի կողմից ճնշման մասին SNC-Lavalin ինժեներաշինարարական ընկերությունում խարդախության մասին գործի հետաքննության կապակցությամբ:
Ուիլսոն Ռեյբոուլդի տվյալներով՝ նրան ստիպել են ազդել դաշնային դատախազների վրա, որպեսզի նրանք դադարեցնեն քրեական գործը:
Որպես ապացույց նա ներկայացրել է էլեկտրոնային հաղորդագրությունները եւ պատմել գրասենյակի աշխատակիցների հետ ունեցած անձնական եւ հեռախոսային խոսակցությունները:
Մոնրեալում գտնվող SNC-Lavalin ընկերության ղեկավարությանը կասկածում են Լիբիայի բռնապետ Մուամար Քադաֆիի ընտանիքին 48 մլն կանադական դոլարի չափով կաշառք վճարելու մեջ՝ մի շարք որոշումների վրա ազդելու համար:
Թրյուդոն հերքում է իր մեղքը եւ հրաժարվում է հրաժարական տալ, որը պահանջում է ընդդիմությումնը: Հոկտեմբերին Կանադայում խորհրդարանական ընտրություններ կանցկացվեն: