ՌԴ նախագահ Վլադիմիր Պուտինը Ռուսաստանի Հերոսի կոչում է շնորհել «Ուրալյան ավիաուղիների» Ա321 օդանավի 2 օդաչուներին, որոնք օգոստոսի 15-ին Մերձմոսկվայում իրականացրել էին վթարային վայրէջք, փոխանցում է «ՌԻԱ Նովոստի»-ն:
«Ես հրաման եմ ստորագրել օդանավի անձնակազմին պարգեւատրելու մասին, որը, ինչպես հայտնի է, ոչ սովորական կոշտ վայրէջք էր կատարել Ժուկովսկու օդանավակայանում: Օդանավի հրամանատարը եւ երկրորդ օդաչուն պարգեւատրվել են Ռուսաստանի Դաշնության Հերոսի կոչումներով, անձնակազմի մնացյալ բոլոր անդամները՝ Խիզախության շքանշանով»,- ասել է Պուտինը՝ բացելով ԱԽ մշտական անդամների հետ խորհրդակցությունը:
Նա նաեւ հույս է հայտնել, որ նման իրադարձությունները հնարավորինս քիչ կլինեն: «Կցանկանայի, որ ընդհանրապես ոչ մի նման բան տեղի չունենար»,- ասել է նա: «Բայց այս ընկերության օդաչուական կազմի պատրաստվածության որակը կարելի է գոհացուցիչ համարել»,- նշել է Պուտինը:
«Ուրալյան ավիաուղիների» Ա321 օդանավն իրականացնում էր Մոսկվայից Սիմֆերոպոլ չվերթ: Օդանավում կար 226 ուղեւոր եւ անձնակազմի 7 անդամները:
Թռիչքից անմիջապես հետո օդանավը բախվել է ճայերի, թռչուններն ընկել են շարժիչի մեջ: Օդանավի հրամանատար Դամիր Յուսուպովը եւ երկրորդ օդաչու Գեորգի Մուրզինը որոշել են շտապ վայրէջք կատարել Ռիբինսկոյե գյուղից ոչ հեռու եգիպտացորենի դաշտում: Ռոսավիացիայի ղեկավար Ալեքսանդր Ներադկոյի խոսքով՝ դա միակ ճիշտ որոշումն էր:
Օդանավը բարեհաջող վայրէջք է կատարել անջատված շարժիչներով եւ հավաքած անիվներով: Անձնակազմը ուղեւորներին տարհանել է փչովի սանդուղքներով: Վերջին տեղեկություններով՝ բժշկական օգնության է դիմել 76 մարդ, այդ թվում՝ 19 երեխա:
Քննչական կոմիտեն քրեական գործ է հարուցել երթեւեկության անվտանգության եւ օդային տրանսպորտի շահագործման կանոնների խախտման մասին: Քննություն է կատարում նաեւ հատուկ հանձնաժողովը:
