Վարչապետ Նիկոլ Փաշինյանը ֆեյսբուքյան իր էջում նկարագրել է դստեր՝ Արփիի ծննդյան «ճոխ» արարողությունը՝ «հատուկ ուժեղ լրատվամիջոցների կոալիցիայի» համար։
Նրա գրառման մեջ, մասնավորապես, ասված է․
«Լավատեղյակ աղբյուրներից հայտնի է դարձել, որ այսօր Բահամյան կղզիներում տեղի է ունեցել վարչապետ Ն. Փաշինյանի դստեր՝ Արփիի ծննդյան ճոխ արարողությունը:
Էլիտար քեֆին մասնակցել են բարձրաստիճան պաշտոնյաներ, օլիգարխներ, քրեական հեղինակություններ, նարկոբադոններ եւ մի կին ատամնատեխնիկ:
Նրանք բոլորը քծնել են վարչապետի դստերը, ասելով՝ Արփի ջան, ծնունդդ շնորհավոր:
Այդ առիթով Հայաստանից բահամներ 10 չարտերային չվերթ է իրականացվել՝ ոսկեջրած օդանավերով:
Մատուցվել է կոկորդիլոսի խաշլամա, շնաձկի տոլմա:
Վերջում, որպես դեսերտ 200 տարվա կոնյակ, 60 տարվա փախլավայի հետ: Ու այս ամենը պետբյուջեի հաշվին:
Էլիտար ծննդյան առիթով Ատլանտյան օվկիանոսի երթեւեկությունը դադարեցվել է:
Ուժեղ լրատվամիջոցների կոալիցիա, հատուկ ձեզ համար»։
Քիչ անց՝ Նիկոլ Փաշինյանը տեղադրել է տեսանյութ, որտեղ դուստրը՝ Արփին, պարում է, եւ տեսանյութը մեկնաբանել է նույն ոճով՝ «Իշխանական պրելեստներից ակնհայտորեն շփացած երեխա, որ խոչընդոտում է ազատ լրատվամիջոցի աշխատանքը»: