Ամուլսարի շահագործման արդյունքում կարող են աղտոտվել, թե Ջերմուկի ջրերը, թե Սեւանա լճի ջրերը: Այս մասին այսօր` օգոստոսի 19-ին, լրագրողներին ասաց ակտիվիստ, Սասնա ծռեր կուսակցության անդամ Գեւորգ Սաֆարյանը, ով մասնակցում է Բաղրամյան 26-ի մոտ այս պահին ընթացող ակցիային:
Նշենք, որ ակցիային զուգընթաց Ամուլսարի հարցով վարչապետի հետ հանդիպմանը բողոքի ակցիա է իրականացվում դրսում:
«Ամուլսարի շահագործման արդյունքում կարող են աղտոտվել, թե Ջերմուկի ջրերը, թե Սեւանա լճի ջրերը: Իսկ մենք գիտենք, որ Սեւանա լիճն ինքը Հայաստանում եւ տարածաշրջանում ամենամեծ քաղցրահամ ջրի աղբյուրն է: Եթե մենք աղտոտեցինք Սեւանը, ապա այս տարածաշրջանում այլեւս բնակվել չի լինի»,-ասաց նա:
Գեւորգ Սաֆարյանի կարծիքով` Քննչական կոմիտեն գնում է մանիպուլյացիաների, քանի որ հանքի փորձաքննություն տեղի չի ունեցել, տեղի է ունեցել փաստաթղթի փորձաքննություն. «Փորձաքննության արդյունքում այդ ընկերությունը ֆիքսել է, որ ինքը չի կարող երաշխիքներ տալ ստորգետնյա կամ վերգետնյա ջրերը չեն աղտոտվի, որովհետեւ առկա փաստաթղթում չկան բավարար տվյալներ, այսինքն այստեղ փորձագետներն ասում են, որ ջրերը կամ կաղտոտվեն, կամ չեն աղտոտվի»:
Նա նշեց, որ Ամուլսարի հարցով Կառավարությունը պետք է քաղաքական որոշում կայացնի:
Ավելի վաղ NEWS.am-ը հայտնել էր, որ Քննչական կոմիտեն հրապարակել է Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները, որի կատարումը հանձնարարվել էր Advanced Resources Development (ELARD) ընկերության փորձագետների խմբին:
Ըստ այդ փորձաքննության արդյունքների՝ եզրակացության ընթացքում 16 կետ է նշվել, որոնք պահպանելու դեպքում բնապահպանական ռիսկերը կդառնան կառավարելի:
Այս պահին Բաղրամյան 26-ում վարչապետ Նիկոլ Փաշինյանը ջերմուկցիներին հրավիրել է հանդիպման: Միաժամանակ Բաղրամյան-26-ի դիմաց բողոքի ակցիա է ընթանում ընդդեմ Ամուլսարի հանքի շահագործման:
