Երեք օրում բացահայտվել է 115 հանցագործություն. Ծեծ, խարդախություն, սպանության փորձ, անձի առեւանգում

Անցած 3 օրվա ընթացքում հանրապետությունում արձանագրվել է ճանապարհատրանսպորտային 42 պատահար, ինչի հետեւանքով 1 մարդ զոհվել է, 62-ը՝ ստացել տարբեր աստիճանի մարմնական վնասվածքներ։

Ըստ ոստիկանության օպերատիվ հաղորդագրությունների ամփոփագրերի` օգոստոսի 16-ից 19-ը ՀՀ ոստիկանության տարբեր ստորաբաժանումների կողմից բացահայտվել է հանցագործության 115 դեպք, այդ թվում՝ 4-ը նախկինում կատարված։

Մասնավորապես՝ մարմնական վնասվածք հասցնելու 19, անձնական ունեցվածքի գողության 17, ծեծի 14, խարդախության 8, սպանության սպառնալիքի 7, մշակումն արգելված թմրանյութեր պարունակող բույսեր աճեցնելու 5, ապօրինի ծառահատման եւ պաշտոնեական լիազորությունների չարաշահման 4-ական, յուրացման կամ վատնման, թմրամիջոցի հայտնաբերման, զենք-զինամթերքի առգրավման, խուլիգանության ու սառը զենք կրելու 3-ական, սպանության, անձի առեւանգման, պետական-հասարակական ունեցվածքի գողության, գույքի դիտավորությամբ վնասման, հարկերից խուսափելու, շորթման, որսագողության, իշխանության ներկայացուցչի նկատմամբ բռնության, դիակը կամ թաղման վայրերն անարգանքի ենթարկելու, պատմության եւ մշակույթի հուշարձաններ ոչնչացնելու կամ վնասելու, բժշկական օգնություն եւ սպասարկում իրականացնողների կողմից մասնագիտական պարտականությունները չկատարելու կամ ոչ պատշաճ կատարելու, սպառողին խաբելու, տասնվեց տարին չլրացած անձի հետ սեռական հարաբերություն ունենալու, աշխատանքի պաշտպանության կանոնների խախտման, ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու, խաբեությամբ գույքի վնասման, ինքնասպանության հասցնելու ու երկաթուղային, օդային կամ ջրային տրանսպորտի երթեւեկության անվտանգության եւ շահագործման կանոնները խախտելու 1-ական դեպք։

Հայտնաբերվել է 1 անհետ կորած եւ 5 հետախուզվող, կամավոր ներկայացել է՝ 2-ը։

Գրանցվել է զենք-զինամթերքի կամավոր հանձնման 3 դեպք։

Նախկինում կատարված հանցագործությունների բացահայտվել է անձնական ունեցվածքի գողության 3 եւ մարմնական վնասվածք հասցնելու 1 դեպք։

Լուրեր Հայաստանից - NEWS.am

Տպել