Հայաստանի նախագահ Սերժ Սարգսյանն այսօր` մարտի 26-ին ընդունել է ՌԴ պետական դումայի «Ռուսաստան-Հայաստան» պատգամավորական բարեկամության խմբի պատվիրակությանը եւ «Միացյալ Ռուսաստան» կուսակցության «Երիտասարդ գվարդիա» շարժման ներկայացուցիչներին, ովքեր այսօր Երեւանում ներկա են գտնվելու Հայաստանի եւ Ռուսաստանի ֆուտբոլի ազգային հավաքականների խաղին:
Նախագահի մամուլի գրասենյակից NEWS.am-ին հայտնում են, որ երկու երկրների միջեւ հարաբերությունների ամրապնդման գործում Սարգսյանը կարեւորել է միջխորհրդարանական համագործակցությունը` ընդգծելով հատկապես պատգամավորական բարեկամության խմբերի մեծ դերը: Նշելով, որ հայ-ռուսական ռազմավարական գործընկերությունը շարունակաբար խորանում եւ ամրապնդվում է երկրների նախագահների շփումների եւ տարբեր մակարդակի փոխայցելությունների ու հանդիպումների արդյունքում, Սերժ Սարգսյանը շնորհակալություն է հայտնել ՌԴ խորհրդարանականներին` իրենց ամենօրյա աշխատանքով երկու երկրների եւ ժողովուրդների միջեւ բարեկամության ամրապնդմանը նպաստելու համար:
«Մենք պետք է սերնդե-սերունդ մեր երիտասարդներին փոխանցենք այդ բարեկամությունը, ինչը մեր ավագ սերունդն արել է մեզ համար»,-ասել է նախագահը` նկատի առնելով, որ հանդիպմանը ներկա են նաեւ իրենց հայ ընկերների հետ համագործակցության ծրագրեր նախաձեռնած «Երիտասարդ գվարդիա» շարժման ներկայացուցիչները:
Հանրապետության ղեկավարը նշել է, թե հաճելի է, որ ՌԴ խորհրդարանականների այցը մեր երկիր համընկել է երկու երկրների ֆուտբոլի ազգային հավաքականների խաղի օրվան, որը, Նախագահի համոզմամբ, կվերծավի բարեկամության տոնի:
«Կարեւորն այն է, որ մեր բոլոր սպորտային մրցույթները միշտ վերածվել են բարեկամության տոնի, եւ վստահ եմ, որ այս խաղն էլ այդպիսին կլինի: Բնական է, դուք կերկրպագեք Ռուսաստանի հավաքականին, մենք` մեր հավաքականին, հուսալով, որ կհաղթի բարեկամությունը»,-ասել է նախագահը:
Հանդիպման ավարտին ՌԴ պատվիրակության անդամները նախագահ Սերժ Սարգսյանին նվիրել են իրենց ազգային հավաքականի ֆուտբոլիստների ստորագրություններով ֆուտբոլի գնդակ` ընդգծելով, որ խաղի ցանկացած ելքի դեպքում, իհարկե, հաղթելու է բարեկամությունը: