Անցած տարի այս օրերին ՀՀ վարչապետ Նիկոլ Փաշինյանն իր կառավարման 100 օրվա առթիվ կազմակերպված մեծ ցույցի ընթացքում հայտարարեց ուղիղ ժողովրդավարության եւ հանրաքվեի անցկացման անհրաժեշտության մասին: Այս մասին այսօր Սարյանի պուրակում Ամուլսարի ոսկու հանքի շահագործման խնդրի շուրջ քննարկումների ընթացքում հայտարարել է բնապահպան Աննա Ժամակոչյանը:
Սակայն, ինչպես նշել է բնապահպանը, երեկ վարչապետն այդ հարցով քննարկում անցկացրեց ոչ թե իր ընտրողների առաջ, այլ Բաղրամյան 26-ում, առանց որեւէ ուղիղ միացման:
«Ժողովուրդը կրկին բաժանվեց Բաղրամյան 26-ի մոտ ոստիկանական պատով»,- նշել է Ժամակոչյանը:
Ընդ որում, նա ընդգծել է, որ հանքի շահագործման դեմ բողոքողների համար փակ է եղել նաեւ խորհրդարանի այգին: Այդպիսով, ըստ բնապահպանի, քաղաքացիներին թույլ չեն տվել մասնակցել այդ թեմայով հանրային քննարկումներին: Արդյունքում, Ժամակոչյանի խոսքով, ոստիկանության միջամտության եւ ուժի կիրառման պատճառով ակցիայի մասնակիցներից մի քանիսը բերման է ենթարկվել:
«Մենք ֆիքսում ենք, որ վարչապետը հետ է կանգնում իր խոստումներից, եւ փորձաքննության արդյունքները ձեռքին Ջերմուկ գնալու փոխարեն նա նախընտրում է փակ քննարկում անցկացնել նախագահական նստավայրում: Այդ քննարկմանը մասնակցել են ոչ միայն գյուղի բնակիչները, այլ նաեւ մարդիկ, որոնք առաջ են տանում «Լիդան» ընկերության շահերը, մասնավորապես, ընկերության աշխատակիցներն ու Գնդեւազ գյուղի նախկին ղեկավարը, որն այժմ անցնում է քրեական գործով»,- հստակեցրել է բնապահպանը:
Նրա խոսքով՝ այդ հանդիպման ընթացքում Ջերմուկի բնակիչներն ու բնապահպանները հնարավորություն չեն ունեցել լիարժեք ներկայացնելու իրենց փաստարկներն ու մտահոգությունը, քանի որ քննարկումների փոխարեն վարչապետը ներկայացրել է քայլերը, որոնք ձեռնարկել է գործադիր իշխանությունը՝ փորձելով հիմնավորել հանքի շահագործման անհրաժեշտությունը:
Ընդ որում, բնապահպանը նշել է, որ վարչապետն ուշադրություն չի դարձրել հանքի շահագործման դեմ ուղղված քաղաքացիների ստորագրություններին:
«Երեկվա իր հայտարարությամբ վարչապետը քաղաքացիների մոտ ամրապնդեց վատատեսական կանխատեսումները, որն է՝ Ամուլսարի հարցով ՀՀ կառավարությունը պատշաճ կերպով չի պաշտպանում իր քաղաքացիների իրավունքները: Նման պահվածքը Վայոց Ձորի եւ Ջերմուկի բնակիչներին թույլ է տալիս կասկածի տակ դնել գործող իշխանությունների լեգիտիմությունը»,- ասել է Ժամակոչյանը: