Անկախ պետությունը բարձրագույն արժեք է ղարաբաղցիների համար: Այդ մասին Լուրեր Հայաստանից-NEWS.am-ին հայտարարել է Ազգային ժողովի փոխնախագահ, «Դաշնակցություն» խմբակցության ներկայացուցիչ Վահրամ Բալայանը:
1991 թվականի սեպտեմբերի 2-ին «ԽՍՀՄ կազմից դուրս գալու որոշումները կայացնելու կարգի մասին» ԽՍՀՄ օրենքի հիման վրա ԼՂԻՄ եւ Շահումյանի շրջանի բոլոր մակարդակներում պատգամավորների համատեղ նիստի արդյունքում հռչակվեց Լեռնային Ղարաբաղի Հանրապետությունը (ԼՂՀ): Հռչակագրում, մասնավորապես, նշված է, որ այն արտահայտում է «ժողովրդի կամքը՝ 1988-1991 թթ. փաստացի անցկացված հանրաքվեով եւ ԼՂԻՄ ու Շահումյան շրջանի իշխանության մարմինների որոշումներով ամրապնդված, ժողովրդի՝ ազատության, անկախության, իրավահավասարության եւ բարիդրացիության ձգտումը»:
«Արցախցիների համար դա կարեւորագույն տոն է: Ժողովուրդը մեծ խանդավառությամբ է մասնակցում տոնախմբությանը»,-նշել է Բալայանը:
Սակայն տոնակատարության հետ մեկտեղ դա տարվա ընթացքում կատարված աշխատանքի ինքնատիպ հաշվետվություն է, հավելել է խորհրդարանի փոխնախագահը: Ընդ որում, դա ե′ւ իշխանության հաշվետությունն է ժողովրդին, ե′ւ հասարակության հաշվետվությունն է ինքն իր առջեւ:
«28 տարվա ընթացքում Արցախը բարդ ճանապարհ է անցել՝ պատերազմ, հետպատերազմյան դժվարություններ: Այժմ ղարաբաղցիները կառուցում են եվրոպական չափանիշներին համապատասխան պետություն, զարգացնում են դեմոկրատական ինստիտուտները: Դա են ցանկանում ինչպես իշխանությունները, այնպես էլ ժողովուրդը»,-ընդգծել է Վահրամ Բալայանը:
