Լինելով եվրոպական քաղաքակրթության եւ արժեհամակարգի անբաժանելի մասը՝ Հայաստանը շարունակում է խորացնել Եվրամիության եւ Միության անդամ երկրների հետ հարաբերությունները: Այս մասին հայտարարեց Հայաստանի ԱԳ նախարար Զոհրաբ Մնացականյանը՝ ելույթ ունենալով Երեւանում անցկացվող դեսպանների եւ դիվանագիտական ներկայացուցչությունների ղեկավարների համաժողովում:
Նրա խոսքով՝ զարգանում է Եվրամիության հետ Համապարփակ եւ ընդլայնված գործընկերության համաձայնագրի հիմքով երկխոսությունը: Նախարարը շեշտեց նաեւ Հայաստանի ժողովրդավարական բարեփոխումներին եւ պետական կառույցներին տրամադրվող աջակցության կարեւորությունը, ինչպես նաեւ տարբեր ոլորտներում համագործակցությունը, ԵՄ մասնակցությունը տարածաշրջանային ծրագրերին:
ԱԳ նախարարն առանձնապես ընդգծեց Ֆրանսիայի եւ Գերմանիայի հետ հարաբերությունները, ինչպես նաեւ նշեց Հայաստան-Կիպրոս-Հունաստան համագործակցության նոր ձեւաչափի մասին:
