Հայաստանի պատմական կապերը եւ հայկական ներկայությունը Մերձավոր Արևելքում ունեն քաղաքակրթական նշանակություն: Այս մասին ելույթ ունենալով դեսպանների եւ դիվանագիտական գերատեսչությունների ղեկավարների հավաքի ժամանակ ասաց արտաքին գործերի նախարար Զոհրաբ Մնացականյանը:
Նրա խոսքով՝ դա արտահայտվում է այնպիսի արժեքներում, ինչպիսիք են հանդուրժողականությունն ու երկխոսությունը, կրոնների՝ քրիստոնեության եւ իսլամի խաղաղ գոյակցությունը:
Հայ ժողովուրդը ավանդական բարեկամության ամուր հիմքեր է ստեղծել Եգիպտոսի, Լիբանանի, Սիրիայի եւ Իրաքի ժողովուրդների հետ:
«Սիրիական ճգնաժամն անմիջական ազդեցություն ունի Հայաստանի եւ տարածաշրջանում հայկական ներկայության վրա եւ չի կարող մատնվել անտարբերության։ Սիրիայում գործող Հայաստանի մարդասիրական առաքելությունն իրականացվում է այս մտահոգությունները հասցեագրելու նպատակով», - ասաց նախարարը՝ հավելելով, որ Հայաստանը հետեւողականորեն ընդլայնում է իր ներգրավածությունը նաեւ Ծոցի երկրներում։
«Հայաստանը մտադիր է զարգացնել իր հարաբերությունները Մերձավոր Արևելքի բոլոր երկրների հետ առանց բացառության՝ հիմնվելով իր արտաքին քաղաքական հռչակված սկզբունքների վրա», - ասաց ԱԳ նախարարը: