Օգոստոսի 27-ին ՀՀ ԱԻ նախարար Ֆելիքս Ցոլակյանն ընդունել է Հայաստանի Հանրապետությունում դիվանագիտական իր առաքելությունն ավարտող Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադիին: Այս մասին հայտնում են ԱԻՆ լրատվական ծառայությունից։
Նախարարը դեսպանին իր գոհունակությունն է հայտնել պաշտոնավարման ընթացքում կատարած աշխատանքի համար և նշել, որ Սեյեդ Քազեմ Սաջադին դիվանագիտական առաքելության ընթացքում ստեղծել է բավարար բարյացակամության մթնոլորտ հաջորդ դեսպանի արդյունավետ պաշտոնավարման համար:
Ներկայում Հայաստանում գրեթե ամենուր տարբեր չափերի և վտանգավորության հրդեհներ են, որոնց ԱԻՆ-ը հաջողությամբ կարողանում է դիմագրավել: Նախարարը նշել է, անհրաժեշտության դեպքում, հավատարիմ մնալով հայ-իրանական դարավոր բարեկամությանը և փոխօգնության պատրաստակամությանը, Հայաստանը օգնության նպատակով կդիմի Իրանին:
Նախարարը գոհունակությամբ հիշատակել է, որ ՀՀ պատվիրակության կազմում Իրան կատարած այցելությունը եղել է երկուստեք շատ արդյունավետ, հատկապես՝ տպավորվել է Իրանի նախագահի խարիզմատիկ կերպարով:
Սեյեդ Քազեմ Սաջադին նշել է, որ ջերմ զգացմունքներ ունի Հայաստանի և հայ ժողովրդի նկատմամբ և այսուհետ որտեղ էլ լինի, կաշխատի ուժերի ներածին չափով օգտակար լինել հայ-իրանական բարեկամությանը:
Նա շնորհակալություն է հայտնել նախարարին Իրանին պատուհասած ջրհեղեղի ժամանակ օժանդակության համար և նշել, որ Իրանի ղեկավարությունը մեծ ցանկություն ունի շարունակելով բարեկամությունը, Հայաստանի հետ հաստատել որակական նոր հարաբերություններ:
Հանդիպման ավարտին նախարարը, հրաժեշտ տալով դեսպանին, հույս է հայտնել, որ ՀՀ-ում Իրանի նոր դեսպանը կշարունակի գոյություն ունեցող բարի ավանդույթը:
