Ուկրաինայի նախագահ Վլադիմիր Զելենսկին խորհրդարանին կառաջարկի վարչապետի պաշտոնին նշանակել Ալեքսեյ Գոնչարուկին, տեղեկացնում է «Ուկրաինսկայա պրավդա»-ն՝ հղում կատարելով աղբյուրներին։
Աղբյուրների համաձայն՝ Զելենսկին մտադիր է խորհրդակցություն անցկացնել կառավարության մյուս անդամների թեկնածուների վերաբերյալ։
Ալեքսեյ Գոնչարուկը նախագահի աշխատակազմի ղեկավարի տեղակալն է։ Կրթությամբ իրավաբան է, աշխատել է որպես կառավարիչ գործընկեր իրավաբանական ընկերություններից մեկում։ 2014-ին առաջադրվել է պատգամավոր «Մարդկանց ուժը» կուսակցությունից, որն այն ժամանակ հավաքել էր 0,1 տոկոս ձայն։
Հետագայում Գոնչարուկը եղել է էկոլոգիայի նախարար Իգոր Շեւչենկոյի արտահաստիքային խորհրդականը։ Այնուհետեւ նախագահի ղեկավարի աշխատակազմի ներկայիս ղեկավարի տեղակալն աշխատել է առաջին փոխվարչապետ Ստեպան Կուբիվի խորհրդական։ 2015-ից Գոնչարուկը գլխավորել է արագ արձագանքման BRDO գրասենյակը, որը ֆինանսավորում է Եվրոպական միությունը։
Այժմ Գոնչարուկը ուղեկցում է նախագահին աշխատանքային ուղեւորությունների եւ կարեւոր տնտեսական հանդիպումների ժամանակ։