Իրկուտսկի շրջանի պատգամավոր Վյաչեսլավ Մարխաեւը հայտարարել է ՌԻԱ Նովոստի-ին, որ դիմել է գլխավոր դատախազ Յուրի Չայկային եւ հայց ներկայացրել Մոսկվայի քաղաքային դատարան ՌԵՆ ՏՎ հեռուստաալիքի նյութերի կապակցությամբ, որոնք, ըստ խորհրդարանականի, արատավորում են նրա պատիվն ու արժանապատվությունը:
Ավելի վաղ ՌԵՆ ՏՎ-ն իր կայքում հաղորդել էր, որ հեռուստաալիքի լրագրող Եվգենիա Մոգիլեւսկայան դիմել է Քննչական կոմիտե եւ հաղորդել իր վրա Մարխաեւի հարձակման մասին: Ըստ հեռուստաալիքի հայտարարության՝ թղթակիցը խնդրել է իրավապահներին պատգամավորին պատասխանատվության ենթարկել բռնություն գործադրելու համար: Ինչպես ասվում է ՌԵՆ ՏՎ-ի կայքում, դեպքը տեղի է ունեցել, երբ նկարահանող խումբը հարց է ուղղել պատգամավոր Մարխաեւին մոլախաղերի բիզնեսում իր ընտանիքի ներգրավվածության մասին:
«Ես համապատասխան նամակով դիմել եմ գլխավոր դատախազ Յուրի Չայկային եւ հայց եմ ներկայացրել Մոսկվայի քաղաքային դատարան»,-ասել է խորհրդարանականը: Նրա կարծիքով՝ հեռուստաալիքի նյութերը արատավորում են իր պատիվն ու արժանապատվությունը:
Նա պարզաբանել է, որ առաջադրվում է Ուլան Ուդեի քաղաքապետի պաշտոնում եւ այդ միջադեպը կապել է ընտրությունների հետ: «Լրագրողներին դուրս են հրավիրել հենց բնակիչները, որոնք եկել էին ինձ հետ հանդիպելու: Դա պարզապես սադրանք է»,-ասել է Մարխաեւը: