Հայաստանի վարչապետ Նիկոլ Փաշինյանը հույս ունի, որ Իրանի նախագահ Հասան Ռոուհանին կմասնակցի Երեւանում հոկտեմբերի սկզբում կայանալիք ԵԱՏՄ գագաթնաժողովին: Այդ մասին նա հայտարարել է Երեւանում իրանական ԶԼՄ-ների պատվիրակության հետ հանդիպման ժամանակ, հաղորդում է ԻՌՆԱ-ն:
Հանդիպման ընթացքում Փաշինյանը նշել է, որ գագաթնաժողովի շրջանակում Հայաստանն ու Իրանը կարող են պայմանավորվել երկկողմանի հարաբերությունները զարգացնելու ուղիների եւ հետագա համատեղ ծրագրերի մասին: Նա նաեւ ընդգծել է երկկողմանի հարաբերությունների ընդլայնման անհրաժեշտությունը եւ նշել, որ երկու երկրների օրակարգում մի շարք ծրագրեր կիրագործվեն ապագայում: «Հուսով եմ, որ նախագահ Հասան Ռոուհանիի այցը Հայաստան կկայանա գագաթնաժողովի ժամանակ: Մենք կարող ենք բանակցել Եվրասիական միության շրջանակում տարբեր հարցերի շուրջ, որոնք բխում են երկու երկրների շահերից»,-նշել է նա:
Վարչապետի խոսքով՝ Հայաստանը ԵԱՏՄ անդամ միակ երկիրն է, որն ունի Իրանի հետ ցամաքային սահման. «դա շատ կարեւոր գործոն է, որից պետք է օգտվել, եւ Հայաստան-Իրան երթուղին, որպես իրանյան ապրանքները Եվրասիական միություն մատակարարելու համար տրանզիտային ուղի, մեզ համար ունի մեծ նշանակություն»: