Մեղադրանքների թիվը, որոնք ներկայացվել են մարտին նորզելանդական Քրայսթչերչի մզկիթներում ահաբեկչությունների տեսանյութերի տարածման համար, հասել է 35-ի, տեղեկացնում է ՏԱՍՍ-ը՝ հղում կատարելով Radio New Zealand-ին։
Նրա տվյալներով՝ մեղադրանքները ներկայացվել են մարտի 16-ից մինչեւ օգոստոսի 21-ի շրջանում։ 24 դեպքում գործը հասել է դատարան, ընդ որում՝ դրանցից տասում դատավարությունն անցկացվել է երիտասարդության գործերով դատարանում։ Ինը դեպքում ոստիկանները սահմանափակվել են նախազգուշացմամբ։
Մարտի 15-ին Նոր Զելանդիայում տեղի ունեցան հարձակումներ Քրայսթչերչ քաղաքի մզկիթում։ Գրոհի հետեւանքով 50 մարդ զոհվեց, 50 հոգի վիրավորվեց։ Նոր Զելանդիայի վարչապետ Ջասինդա Արդեռնը հայտարարեց, որ հարձակումները ահաբեկչական գրոհներ էին։ Հարձակվողը՝ 28-ամյա ավստրալացի Բրենթոն Տարանտը, կալանքի է վերցվել, նրան ներկայացվել է մեղադրանք սպանության համար։ Տարանտը մզկիթի վրա հարձակումը նկարահանել եւ հրապարակել է ինտերնետում։ Տեսանյութի տարածումը Նոր Զելանդիայի իշխանություններն արգելել են դեռ ահաբեկչության օրը։
Նիստը, որում լսվելու են ավստրալացուն ներկայացվող մեղադրանքները եւ բացատրությունները, տեղի կունենա 2020 թվականի մայիսի 4-ին։ Ենթադրվում է, որ Տարանտի դատավարությունը կարող է տեւել 6-12 շաբաթ։