Հայաստանի ու Արցախի միջև ռազմաքաղաքական դաշինքի կնքման հարցի վերաբերյալ ես ներկայումս կխուսափեմ որեւէ մեկնաբանությունից, որովհետեւ դեռևս կարիք կա որոշ չափով խոսելու և գնահատելու։ Այս մասին այսօր՝ օգոստոսի 2-ին, Ստեփանակերտում լրագրողների հետ ճեպազրույցում հայտարարել է ՀՀ արտաքին գործերի նախարար Զոհրաբ Մնացականյանը։
«Ես անմիջապես լինելով բանակցային գործընթացի մասնակից և աշխատելով այդ ուղղությամբ` առաջին հերթին ուզում եմ ընդգծել շատ էական կարևոր մի հարց, որ Արցախի հարցը, ԼՂՀ հակամարտության կարգավորման հարցը առաջին հերթին մարդու հարց է, մեր հայրենակիցների էկզիստենցիալ ֆիզիկական անվտանգության հարց է: Սա գերակա կարևորագույն խնդիր է մեր բոլորիս համար, համազգային հարց է: Եվ դրանից բխող ստատուսի հարցը՝ այս երկուսը միասին ձևավորում են մեր կարևոր գերակայությունները: Այս շրջանակում ենք իրականացնում ենք քաղաքականություն խաղաղ կարգավորման գործընթացի շրջանակներում։ Խաղաղությունը այնընտրանք չունի և այս կետը պնդում ենք` հիմնվելով այն ինքնավստահության վրա, որ Արցախը և Հայաստանն ունեն բավարար կարողություն խաղաղության օրակարգը առաջ տանելու համար: Եվ սրանք գերակա խնդիրներն են, որոնց նպատակին ծառայելու է յուրաքանչյուր գործողություն, որը պետք է լինի մտածված, գնահատված եւ գիտակցված»,- ասել է ԱԳ նախարարը:
ԱՀ ԱԳ նախարար Մասիս Մայիլյանն ասել է, որ ռազմաքաղաքական դաշինքի կնքման հարցը քննարկման փուլում է։
«Կարծում եմ` դրական ընթացքի արդյունքում մենք կարող ենք ստանալ մի իրավիճակ, երբ ունենալով նման փաստաթուղթ, կընդգծենք Արցախի Հանրապետության սուբյեկտայնությունը, որը որոշ չափով դրական ազդեցություն կունենա Հայաստանի համար` որոշակի ճնշումներից խուսափելու իմաստով»,- ասել ԱՀ ԱԳ նախարարը՝ ընդգծելով, որ այդ որոշումը պետք է ընդունվի և կյանքի կոչվի համատեղ աշխատանքի արդյունքում։