Երկուշաբթի Մեքսիկայում Կուերնավակ քաղաքի «Էստրելիա դե օրո» ավտոկայանի վրա զինված հարձակման հետեւանքով զոհվել է 6 մարդ, նշված է Մորելոս նահանգի դատախազության հաղորդագրության մեջ, փոխանցում է «ՌԻԱ Նովոստի»-ն:
«Ըստ նախնական տեղեկությունների՝ հարձակումը ավտոկայանում եղած կոնկրետ մարդկանց էր նպատակաուղղված: Շտապ օգնության ծառայությունը հաստատել է տեղում 5 տղամարդու մահվան փաստը, եւս մեկ տուժած ստացած վնասվածքների հետեւանքով մահացել է ավելի ուշ»,- նշված է տեղական դատախազության մամուլի հաղորդագրության մեջ:
Գերատեսչության տեղեկություններով՝ հարձակման թիրախում զբոսաշրջիկները կամ ավտոկայանի այլ այցելուները չէին: Նահանգի ոստիկանության վարչությունը, քրեական ոստիկանությունը, Ազգային գվարդիան եւ Մեքսիկայի բանակը միջադեպի համատեղ քննություն են անցկացնում:
Մորելոս նահանգում վերջին շաբաթում գրանցվել է կանխամտածված սպանության 17 դեպք: Անվտանգության հարցերով պետական հանձնաժողովը շրջանում բռնությամբ ուղեկցվող հանցագործությունների աճը կապում է քրեական հեղինակություն Սանտյագո Մասարիին վերջերս կալանավորելուց հետո հանցավոր խմբավորումների միջեւ ազդեցության համար պայքարի հետ: