Viking Cruises ընկերությունը սկսել է «Ultimate World Cruise» աշխարհի ամենաերկար ծովային ճամփորդությունը՝ 245 օր, 6 մայրցամաք, ավելի քան 50 երկիր, նպատակը Գինեսի համաշխարհային ռեկորդ սահմանելն է, հաղորդում է CNN-ը:
Օգոստոսի 31-ին 930 հյուրերով լի «Վիքինգ Սան» զբոսանավը շարժվել է Լոնդոնի Գրինվիչ կառանատեղիից: Ճամփորդությունը կներառի գրեթե ողջ երկրագունդը՝ հասնելով 6 մայրցամաքերի եւ կանգ առնելով 51 երկրների 111 նավահանգիստներում:
8 ամիս տեւողությամբ ճամփորդությունը, որը կավարտվի Լոնդոնում, ներառում է կանգառներ Սկանդինավիայում, Կարիբներում եւ ողջ Հարավային Ամերիկայում: Ապա նավը ճանապարհը կշարունակի Խաղաղ օվկիանոսի կղզիներում, այնուհետեւ Ավստրալիայում եւ Ասիայում՝ նախքան Միջերկրական ծով եւ Եվրոպա վերադառնալը:
Ճանապարհին ուղեւորները կգիշերեն 23 քաղաքներում:
Ճամփորդության արժեքը սկսվում է 92 990 դոլարից, որն իր մեջ ներառում է բիզնես դասի ավիատոմսեր, սնունդ եւ անվճար էքսկուրսիաներ յուրաքանչյուր նավահանգիստում:
2017թ. կառուցված «Վիքինգ Սանը» առաջարկում է 10 ճոխ ռեստորաններ: Հավելյալ հարմարություններն են՝ սպա կենտրոն, լողավազան, Explorers' բնապատկերային լաունջ, հատընտիր գրադարաններ եւ թատրոն, որտեղ համաշխարհային մակարդակի ներկայացումներ կցուցադրվեն: