Անհայտ անձինք համացանցում տեղադրել են տվյալների բազա, որը տեղեկություններ է պարունակում Facebook-ի օգտատերերի հարյուր միլիոնավոր հեռախոսահամարների մասին, հայտնում է TechCrunch-ը:
Նշվում է, որ հեռախոսներն ունեցել են ազատ հասանելիություն, տեղեկությունը գաղտնագրով պաշտպանված չէր: Հիմա բազան արդեն ջնջվել է: Այն ներառում էր «419 մլն գրառումից ավելի», որոնք վերաբերել են տարբեր երկրների օգտատերերին: Դրանց թվում 133 մլն գրառումներ կապ ունեին ԱՄՆ-ում բնակվող անձանց ակաունտներին, 50 մլն-ը՝ վիետնամցիներին, իսկ 18 մլն-ը՝ Միացյալ Թագավորության բնակիչներին:
TechCrunch-ի տեղեկություններով՝ յուրաքանչյուր գրառումը պարունակել է ակաունտի նույնականացման համարը եւ դրա հետ կապված հեռախոսահամարը: Որոշ դեպքերում նշվել է օգտատիրոջ բնակության երկիրը, նրա անունը եւ սեռը: Հրապարակման մեջ չի հստակեցվում, թե քանի տոկոս գրառումներ կարող էին պարունակել կրկնվող տեղեկություն կամ սխալ տվյալներ: TechCrunch-ի աշխատակիցների կարծիքով՝ բազայում բերված տեղեկությունները կարող էին թեթեւացնել սպամի ուղարկումը հեռախոսների եւ գրառումների տերերին:
Հրապարակումից հետեւում է, որ տվյալների բազայի ազատ հասանելիության մասին առաջինը TechCrunch-ին իրազեկել է Սանյեմ Ջեն անունով մասնագետը: Առայժմ չի հաջողվել պարզել, թե կոնկրետ ով է Facebook-ի ակաունտների տվյալները հավաքել: Սերվերի տերերին TechCrunch-ի ուղերձից հետո, այն ազատ հասանելիությունից հանվել է:
Facebook-ի պաշտոնական ներկայացուցիչները հայտնել են, որ նշված տեղեկությունները հավաքվել են, ամենայն հավանականությամբ, գործառույթի միջոցով, որը թույլ է տվել Facebook-ում այլ մարդկանց որոնել ըստ նրանց հեռախոսահամարի: Այն չի գործում 2018 թվականի ապրիլից: Սոցցանցի ներկայացուցիչները նաեւ նշել են, որ տեղեկություն չեն ստացել այն մասին, որ անհայտ անձինք բազայում եղած տեղեկությունների միջոցով կարող էին չթույլատրված հասանելիություն ստանալ որեւէ հաշվի:
Facebook-ի ամենամսյա լսարանն անցնում է 2,41 մլրդ մարդուց: Այս թիվը հուլիսին հրապարակել է Facebook ընկերությունը, որին է պատկանում այդ սոցցանցը:
