Հոկտեմբերի 1-ին Երեւանում ԵՏՄ նիստի անցկացնելու որոշումը կայացվել է կոնսենսուսով, բոլոր անդամ երկրների ղեկավարների, այդ թվում ՌԴ ղեկավարի կողմից: Այս մասին, այսօր՝ սեպտեմբերի 6-ին, ԱԺ-ում լրագրողների հետ զրույցում նշեց ԱԳ փոխնախարար Շավարշ Քոչարյանը՝ անդրադառնալով ՌԴ նախագահ Վլադիմիր Պուտինի Հայաստան այցին:
Դիտարկմանը, որ ըստ մամուլի տեղեկությունների դեռ չի հաստատվել իր մասնակցությունը, ԱԳ փոխնախարարը պատասխանեց. «Մարդիկ իրենք են որոշել անցկացնել, սա այն դեպքը չի, ինքը հյուր չի: Այլ հարց, որ նա հրավիրված է նաեւ այդ բարձրագույն խորհրդի նիստին, ինչպես նաեւ զուգահեռ լինելու է մի կոնֆերանս, որին հրավիրված են այլ երկրների ղեկավարներ: Դա Մոլդովայի ղեկավարն է, որը միակ երկիրն է, որ ունի դիտորդի կարգավիճակ, դա Իրանի նախագահն է: Խնդիրն այն է, որ վերջերս մենք ծանուցում ստացանք Իրանից, առ այն, որ իրենք ավարտել են վավերացման բոլոր գործընթացները, իսկ դա նշանակում է, որ ԵՏՄ-Իրան ազատ առեւտրի մասին այդ պայմանագիրն սկսում է գործել: Հրավիրված է նաեւ Սինգապուրի վարչապետը: բոլոր հրավիրվածները, ինչպես նաեւ ԵՏՄ երկրների ղեկավարները, բնականաբար, կմասնակցեն այդ կարեւոր կոնֆերանսին»,-ասաց Շավարշ Քոչարյանը:
